Farg‘ona rus drama teatrining yangi binosi foydalanishga topshirildi

Farg‘ona shahrida Milliy madaniy markaz hamda Farg‘ona rus drama teatrining zamonaviy qiyofada barpo etilgan yangi binosi foydalanishga topshirildi. Bu haqda O‘zA xabar berdi.

Bugungi kunda Farg‘onada 50 dan ortiq millat va elat vakillari tinch-totuvlikda ahil-inoq hayot kechirmoqda. Ularning o‘qishi, ishlashi, iste’dod va salohiyatini erkin namoyon etishi, orzu-maqsadlari va ezgu tashabbuslarini amalga oshirishi uchun barcha imkoniyatlar yaratilgan. Koreys, nemis, slavyan, tojik, qirg‘iz, tatar va yahudiy milliy madaniy markazlari samarali faoliyat ko‘rsatishi uchun barcha qulayliklarga ega muhtasham binoning qad rostlashi bu boradagi sa’y-harakatlarning yana bir amaliy ifodasi bo‘ldi.