O‘zbekistonliklar Happy Caravan turnirida oltin medalga sazovor bo‘ldi
Toshkentda badiiy gimnastika bo‘yicha jahon kubogi bosqichi va Happy Caravan xalqaro turniri yakunlandi. Bu haqda O‘zA xabar berdi.
Xalqaro gimnastika federatsiyasi shafeligida O‘zbekiston gimnastika federatsiyasi, Madaniyat va sport ishlari vazirligi, Milliy olimpiya qo‘mitasi hamkorligida tashkil etilgan nufuzli musobaqalarda O‘zbekiston, Xitoy, Janubiy Koreya, Yaponiya, AQSh, Chexiya, Latviya, JAR, Malayziya, Meksika, Rossiya, Ozarbayjon, Armaniston, Belarus, Vetnam, Isroil, Hindiston, Italiya, Qozog‘iston, Qirg‘iziston kabi davlatlardan 100 nafardan ziyod gimnastikachi g‘oliblik uchun bahslashdi.
Uch kun davom etgan musobaqalar so‘nggida yakkaliklar va guruhlar o‘rtasida gimnastika predmetlari yordamida mashq bajarish bo‘yicha bahslar o‘tkazildi. Gimnastikachi qizlarning halqa, to‘p, bulava va tasma bilan mashq bajarishi, ijro mahorati, musiqa va ritmni his etishi, chaqqon va nafis harakatlari muxlislarga zavq bag‘ishladi.
Happy Caravan xalqaro turniri guruhlar o‘rtasidagi alohida gimnastika predmetlari yordamida mashq bajarish bo‘yicha o‘tkazilgan final musobaqasida gimnastikachilarimiz munosib ishtirok etdi. Bulava va halqa yordamida mashq bajargan Komila Rustamova, Farangiz Ahmedova, Sabrina Ramazonova, Go‘zal Raymanova, Irina Salex va Karina Tog‘ayevadan iborat guruh oltin va kumush medalni qo‘lga kiritdi. Mazkur bahslarda Asal Ahmedova, Saida Davidova, Nigina Qudratullayeva, Yuliya Nushtayeva va Yelena Grubovadan iborat guruh ikkita bronza medal bilan taqdirlandi.
Xalqaro turnirning yakkaliklar o‘rtasidagi bahslarida iqtidorli sportchimiz Anora Davlatova bulavada, Nilufar Shomurodova to‘p bilan mashq bajarishda bronza medalni qo‘lga kiritdi.
Happy Caravan xalqaro turnirida Rossiya, Ozarbayjon, Isroil va Xitoy terma jamoalari a’zolari ham g‘olib va sovrindorlar qatoridan joy oldi.
Badiiy gimnastika bo‘yicha jahon kubogi bosqichi musobaqasida O‘zbekiston sharafini himoya qilgan Yelizaveta Nazarenkova bulavada mashq bajarishda bronza medal bilan taqdirlandi.
Tantanali marosim taniqli san’atkorlar ijrosidagi konsert bilan yakunlandi.
