20-may kuni soat taxminan 22:00 da Toshkentning ba’zi qismlarida aholi qorong‘i osmonda nurga o‘xshash yorug‘likni kuzatgan. Facebook foydalanuvchilari “Voditeli Tashkenta” guruhiga ushbu hodisa haqida guvohlik beruvchi suratlarni joylagan.
“Qiziq, bu nima ekan?” degan savolga ba’zi foydalanuvchilar uning meteorit yoki kometa bo‘lishi mumkinligi haqida taxmin bildirgan bo‘lsa, ba’zilar uning uchar likopcha ekanini hazilona qayd etgan.
Sal keyinroq asl voqeadan xabardorlar vaziyatga oydinlik kiritib, uning Rossiyadan uchirilgan “Topol” raketasi ekani haqida yozishgan.
20-may kuni Rossiyaning Astraxan viloyatidagi “Kapustin Yar” poligonidan RS-12M “Topol” qit’alararo ballistik raketa (QBR) sinov tariqasida uchirildi.
Raketa Moskva vaqti bilan 21:08 (Toshkent vaqti bilan 22:08)da uchirildi. U berilgan aniqlikda Qozog‘iston Respublikasining “Sari-Shagan” poligonidagi nishonni urdi.
Izoh (0)