Qoraqalpog‘istonda yoshlar festival tashkil etildi

Qoraqalpog‘iston Respublikasida “Biz – buyuk yurt farzandlarimiz!” shiori ostida yoshlar festivali bo‘lib o‘tdi, deb yozadi O‘zA.

Festival doirasida stol tennisi va tennis, badiiy gimnastika, futbol bo‘yicha “Kamolot” kubogi musobaqalari o‘tkazildi. “Ekologiya va yoshlar” loyihasida ishtirok etgan ijodkor yoshlar o‘rtasida yer, suv, o‘simlik va hayvonot dunyosi, yerosti boyliklaridan oqilona foydalanish, tabiiy resurslarni tejash to‘g‘risida insholar tanlovi bo‘lib o‘tdi.

Tadbirda umumta’lim maktablari va kasb-hunar kollejlari o‘quvchilari tomonidan tayyorlangan qo‘l mehnati buyumlari, rasmlar ko‘rgazmasi namoyish etildi.

– Poytaxtdan tashrif buyurgan teatr va kino aktyorlari, taniqli san’atkorlarning ishtiroki festivalga yanada fayz bag‘ishladi, – deydi “Kamolot” yoshlar ijtimoiy harakati Qoraqalpog‘iston Respublikasi kengashi yetakchi mutaxassisi Klara Xudoybergenova. – Ayniqsa, “Siz sevgan qahramonlar” deb nomlangan san’atkorlar bilan uchrashuv juda qiziqarli o‘tdi.

Festival Nukus shahri markazidagi amfiteatrda san’at ustalari va yosh ijrochilarning konsert dasturi bilan yakunlandi.