O‘zbekistonda 2014-yilning birinchi choragida sanoat mahsulotlari ishlab chiqarish 8,9%, jumladan, iste’mol tovarlari tayyorlash 12,8% o‘sdi. Sanoat ishlab chiqarishining umumiy hajmida iste’mol tovarlari ulushi 34,4 foizni tashkil qildi, deb yozadi O‘zA.
“O‘zekspomarkaz”da ochilgan ko‘rgazmali seminar Prezident Islom Karimovning 2014-yil 7-aprelda qabul qilingan “O‘zbekiston Respublikasida investitsiya iqlimi va ishbilarmonlik muhitini yanada takomillashtirishga doir qo‘shimcha chora-tadbirlar to‘g‘risida”gi farmoni ijrosini ta’minlash masalalariga bag‘ishlandi.
Farmonga muvofiq soliqlar va boshqa majburiy to‘lovlarni o‘z vaqtida to‘lab kelayotgan, ishlab chiqarish sur’atlarining barqaror o‘sishi va rentabelligini ta’minlayotgan kichik tadbirkorlik subyektlarining moliya-xo‘jalik faoliyatini soliq sohasida tekshirishni ta’qiqlash bo‘yicha moratoriy muddati 2017-yil 1-yanvarga qadar uzaytirildi. Ya’ni, ushbu subyektlarda 2017-yilning 1-yanvariga qadar tekshirish o‘tkazilmaydi. Yuridik shaxslarni tugatish chog‘ida qo‘zg‘atilgan jinoiy ishlar doirasida, shuningdek, byudjet hamda markazlashtirilgan mablag‘lar va resurslardan foydalanish bilan bog‘liq rejadan tashqari tekshirishlar bundan mustasno.
Shuningdek, 2014-yil 1-iyuldan boshlab ko‘p mehnat talab qiladigan tarmoqlar – qurilish materiallari, oziq-ovqat va yengil sanoatda faoliyat yuritadigan kichik korxonalar xodimlarining cheklangan o‘rtacha yillik soni 100 nafardan 200 nafargacha oshirilishi belgilab qo‘yildi.
Kichik tadbirkorlik subyektlari tomonidan davlat byudjetiga ularning hisobvaraqlaridan soliqlarni va boshqa majburiy to‘lovlarni to‘lashda banklar xizmatlari uchun to‘lovlar undirish amaliyoti bekor qilindi.
2014-yil birinchi choragi yakuniga ko‘ra yaratilgan soliq imtiyozlaridan 34 mingdan ortiq korxona foydalangan. Natijada ular 2,4 trillion so‘m mablag‘ini o‘z hisobida qoldirish imkoniga ega bo‘lgan.
Izoh (0)