O‘zbekiston Respublikasi Oliy Majlisi Qonunchilik palatasining Sanoat, qurilish va savdo masalalari qo‘mitasida Prezident Islom Karimovning 2010-yil 21-dekabrda qabul qilingan “2011—2015-yillarda infratuzilmani, transport va kommunikatsiya qurilishini rivojlantirishni jadallashtirish to‘g‘risida”gi qarorida belgilangan milliy avtomagistral yo‘llari yoqasida infratuzilma va servis inshootlarini qurish ko‘rsatkichlarining Buxoro—Qarshi—G‘uzor—Termiz uchastkalarida bajarilishini o‘rganish natijalariga bag‘ishlangan yig‘ilish bo‘lib o‘tdi, deb yozadi O‘zA.
Milliy avtomagistralning Buxoro, Qashqadaryo, Surxondaryo viloyatlari hududidan o‘tadigan qismida 40 dan ziyod zamonaviy xizmat ko‘rsatish, servis, savdo, mehmonxona majmualari, tibbiy yordam punktlari, avtomobillarga yonilg‘i quyish va texnik xizmat ko‘rsatish shoxobchalari barpo etilishi rejalashtirilgan.
Deputatlar 2013-yilda joylarga chiqib, ushbu yo‘nalishlarda olib borilayotgan ishlarni o‘rgangan, nazorat-tahlil yakunlari bo‘yicha qo‘mitaning kengaytirilgan yig‘ilishida mutasaddi tashkilotlarga tegishli tavsiyalar berilgan edi.
Avtomagistralning Qashqadaryo viloyatidan o‘tadigan qismida 20 dan ortiq zamonaviy infratuzilma inshooti barpo etilib, foydalanishga topshirildi. Buning natijasida 200 dan ortiq yangi ish o‘rni yaratildi.
Buxoro va Surxondaryo viloyatlarida bu boradagi chora-tadbirlarni bajarishda sustkashlikka yo‘l qo‘yilmoqda. Avtomagistral yo‘lining ushbu viloyatlardan o‘tadigan qismida foydalanishga topshirilishi rejalashtirilgan 36 ta inshootdan bugungi kungacha atigi 7 tasi qurib bitkazilgan. Dasturda belgilangan bu boradagi ko‘rsatkichlarning to‘liq bajarilmasligiga tadbirkorlik subyektlarining to‘g‘ri tanlanmagani, ish oqilona tashkil etilmagani, tadbirkorlarga kredit berish masalalari o‘z vaqtida hal qilinmagani, buyurtmachilar tomonidan tegishli hujjatlarni rasmiylashtirish ishlari kechiktirilgani sabab bo‘lmoqda.
Izoh (0)