Apple va Samsung o‘rtasidagi patent bo‘yicha sudda ma’lum bo‘lishicha, Stiv Jobsning o‘limi Koreya kompaniyasi uchun yanada agressiv reklama kampaniyasini boshlash uchun sabab bo‘lgan. Bu haqda TJournal xabar berdi.
Ma’lumotlarga ko‘ra, avvalroq Samsung o‘z raqobatdoshiga “hujum” uyushtirish niyatida bo‘lmagan va buni Google amalga oshirishiga umid qilgan. Biroq Stiv Jobs vafot etgach, Samsung Apple bilan “yoqalashish”ga jazm qilgan. Sudga taqdim etilgan yozishmalarda Samsung’ning AQShdagi savdo-sotiq bo‘yicha vitse-prezidenti Mayk Pennington ushbu vaziyatni “iPhone’ga hujum qilish uchun eng yaxshi imkoniyat” deb baholagan.
Koreya kompaniyasidagilarning fikricha, Stiv Jobsning kompaniyadan ketishi uning obro‘siga putur yetkazgan va uning kelajagini shubha ostiga qo‘ygan. Aynan shu g‘oya The Next Big Thing Is Already Here (“Navbatdagi zo‘r narsa allaqachon shu yerda”) reklama kampaniyasiga asos bo‘lib xizmat qilgan. Unda koreys kompaniyasi Apple ishqibozlari ustidan ochiqchasiga kulgan.
Izoh (0)