Oliy Majlis “Parlamentarizm bilimdoni—2014” tanlovini e’lon qildi

O‘zbekiston Respublikasi Oliy Majlisi Qonunchilik palatasi “Parlamentarizm bilimdoni—2014” an’anaviy tanlovi davom etayotganini ma’lum qildi. Tanlov palata rasmiy saytida yoshlar o‘rtasida o‘tkazilmoqda, deyiladi tanlov e’lonida.

Tanlov yoshlarning huquqiy va siyosiy madaniyatini oshirish, ular orasida konstitutsiya g‘oyalarini hamda ushbu g‘oyalar asosida qabul qilingan qonunlarning mazmun-mohiyatini targ‘ib qilishga ko‘maklashish, milliy parlamentning faoliyati to‘g‘risida to‘liq va ishonchli axborot olishni ta’minlash maqsadida o‘tkaziladi.

Tanlov quyidagi talablar asosida o‘tkaziladi:

1. Tanlov ishtirokchilari – 14 yoshdan 30 yoshgacha bo‘lgan yoshlar;
2. Tanlovda ishtirok etishni xohlovchilar tanlov ishtirokchisi so‘rovnomasini to‘ldirishi lozim. Unda o‘zi haqidagi ma’lumotlar (ismi-sharifi, tug‘ilgan yili, ish yoki o‘qish joyi, yashash manzili, telefon raqami) ko‘rsatiladi. Tanlov ishtirokchisining so‘rovnomasi Qonunchilik palatasi saytida joylashtiriladi;
3. Tanlovga beriladigan savollar Qonunchilik palatasining rasmiy saytida har haftaning seshanba kuni joylashtiriladi (mart oyidan dekabrgacha). Tanlov ishtirokchilarining javoblari savol e’lon qilingan haftaning yakshanba kunigacha qabul qilinadi. Ushbu muddat davomida tanlovning har bir qatnashchisi savollarga faqat bir marta javob berishi mumkin. Shuningdek, ishtirok etishni xohlovchilar tanlovning istalgan turidan boshlab qatnashish huquqiga ega;
4. Tanlov savollarining yo‘nalishlari:
   • O‘zbekiston Respublikasi Konstitutsiyasi va qonunlari;
   • Oliy Majlis Qonunchilik palatasi faoliyati;
   • Deputatlik birlashmalari faoliyati (siyosiy partiyalar fraksiyalari, deputatlik guruhlari soni, ularning tarkibi va vakolatlari);
5. Tanlovni baholash mezonlari – har hafta (tanlov tugagunga qadar) seshanba kuni mazkur uchta yo‘nalish bo‘yicha uchta savol to‘rtta javob varianti bilan e’lon qilinadi. Har bir to‘g‘ri javob bir balldan baholanadi. Barcha savol va javoblarning variantlari o‘zbek va rus tillarida joylashtiriladi. Qonunchilik palatasining saytida har dushanba kuni tanlov qatnashchilarining reyting jadvali e’lon qilinadi, unda qatnashchilarning ismi-sharifi va umumiy ballari ko‘rsatiladi;

Tanlov 2014-yil 4-martda boshlangan bo‘lib, 2014-yil 1-dekabrgacha davom etadi. Onlayn tanlovning o‘ziga xos jihati shundaki, unda savollar va javoblar elektron bazaga kiritilgan bo‘lib, natijalar avtomatik tarzda hisoblab chiqiladi va g‘oliblar aniqlanadi.