Qozog‘istonda Toshkent—Chimkent avtomobil trassasi rekonstruksiya qilinadi, deya xabar bermoqda Chimkent shahar ma’muriyati (akimati).
Gazeta.uz’ning yozishicha, G‘arbiy Yevropa—G‘arbiy Xitoy xalqaro tranzit koridorining bir qismi hisoblangan Toshkent—Chimkent trassasi salkam 40 yildan beri O‘zbekiston va Qozog‘istonni bog‘laydi. U 1970-yillarning o‘rtalarida qurilgan va undan foydalanish muddati tugaganiga ancha bo‘lgan.
“Yo‘llarni rekonstruksiya qilish bo‘yicha tanlov o‘tkazildi, g‘oliblar ham aniqlangan bo‘lib, bu bilan xorij kompaniyalari shug‘ullanadi. Ular ishga kirishdi. Qurilish ishlari bir necha bosqichdan iborat va ular 2016-yilda yakuniga yetadi”, – deydi Qozog‘iston avtomobil yo‘llari korxonasi direktori vazifasini bajaruvchi Nurlan Qasimbayev.
“Kun” ma’lumotlariga ko‘ra, Osiyo Taraqqiyot banki tomonidan moliyalashtirilayotgan loyihaga asosan, Toshkent—Chimkent trassasining bir qismi sementbeton qoplamali va to‘rt polosali harakat uchun mo‘ljallangan bo‘ladi. Harakat ishtirokchilarining xavfsizligini ta’minlash maqsadida, avtomobillarning qarama-qarshi yo‘lga chiqib ketishlariga imkon bermaydigan to‘siqlar o‘rnatiladi.
Shuningdek, rekonstruksiya ishlari olib boriladigan uchastkada chorraha (razvyazka) va beshta ko‘prik qurilishi rejalashtirilgan.