Toshkent shahar bojxona boshqarmasi “Boshpochtamt” bojxona posti xodimlari tomonidan pochta jo‘natmalari orqali diniy mazmundagi materiallarning noqonuniy olib o‘tilishiga chek qo‘yildi, deya xabar berdi Davlat bojxona qo‘mitasi matbuot xizmati.
Jumladan, fuqarolar A. Kalitovskaya hamda A. Morozov nomiga Germaniyadan yuborilgan pochta jo‘natmalaridagi buyumlar orasida “Svyashchennoye pisaniye” nomli diniy mazmundagi kitobdan 96 dona borligi aniqlandi.
Shunga o‘xshash holat fuqaro N. Tuxliyev nomiga Daniyadan kelgan pochta jo‘natmasida ham qayd etildi. Jo‘natma amaldagi tartiblarga muvofiq bojxona nazoratidan o‘tkazilganda, unda diniy mazmundagi 15 dona adabiyotlar hamda 1 dona disk borligi ma’lum bo‘ldi.
“Toshkent-Aero” ixtisoslashtirilgan bojxona kompleksi xodimlari tomonidan Kaliningrad—Toshkent yo‘nalishi bo‘yicha uchib kelgan yo‘lovchilardan biri I.Yagmurov bojxona ko‘rigidan o‘tkazilganda, uning yonidagi uyali aloqa vositasida diniy mazmundagi bir nechta elektron materiallar borligi aniqlandi.
Ta’kidlash joizki, 2014-yilning o‘tgan davri mobaynida respublikamiz bojxona xodimlari tomonidan huquqni muhofaza qiluvchi boshqa idoralar vakillari bilan hamkorlikda aniqlangan 284 ta qonunbuzarlik holatlarida turli shakldagi 13,6 ming donadan ortiq diniy mazmundagi adabiyotlarning noqonuniy olib o‘tilishiga chek qo‘yildi.
Hozirda ushbu holatlar yuzasidan bojxona surishtiruvlari olib borilmoqda.
O‘zbekiston Respublikasining “Vijdon erkinligi va diniy tashkilotlar to‘g‘risida”gi Qonunining 19-moddasida chet elda nashr etilgan diniy adabiyotlarni olib kelish va tarqatish, ularning mazmuni qonun hujjatlarida belgilangan tartibda ekspertizadan o‘tkazilganidan keyingina amalga oshirilishi ta’kidlab o‘tilgan.
Izoh (0)