“O‘zbekiston havo yo‘llari” milliy aviakompaniyasi 2014-yilning 30-martidan bahorgi—yozgi parvozlar jadvaliga o‘tdi. Yangi jadval milliy aviakompaniya aviaparki va muhandis-uchuv tarkibi imkoniyatlari, xorijdagi vakillarining takliflari hamda ma’lum yo‘nalishlarga bo‘lgan talablar asosida ishlab chiqildi, deb xabar berdi “UzReport”.
Bahorgi-yozgi mavsumda yo‘lovchilar ehtiyojini yuqori darajada ta’minlashga qaratilgan parvozlar jadvaliga xalqaro yo‘nalishlar bo‘yicha bir qancha o‘zgarishlar kiritildi. Riga—Nyu-York qatnovi haftada ikki marotaba — payshanba va yakshanba kunlari amalga oshiriladi. Frankfurtdan shanba kuni, Parijdan juma kuni, Milandan esa haftaning yettinchi kuni bajariladigan parvozlar yurtimizning turistik salohiyatini namoyish etish maqsadida poytaxtga Urganch orqali amalga oshiriladi. Toshkent—Jeneva yo‘nalishi bekor qilindi, ammo Toshkent—Madrid qatnovi avvalgidek qoladi.
Yaponiyaning Narita shahriga parvozlar haftaning chorshanba va payshanba kunlari amalga oshirilishi rejalashtirilgan.
Milliy aviakompaniya yo‘lovchilari uchun xushxabar — Singapurga yangi qatnovni yo‘lga qo‘yildi. Ushbu yo‘nalishdagi parvozlar chorshanba va payshanbada Malayziya poytaxti Kuala-Lumpur orqali amalga oshiriladi.
MDH davlatlariga esa qatnovlar jadvalida yangi Urganch—Volgograd yo‘nalishi yo‘lga qo‘yilib, parvozlar juma kunlari amalga oshiriladi. Shu qatorda Toshkent—Vladivostok yangi yo‘nalishi bo‘yicha ham qatnov rejalashtirilgan.
Mahalliy yo‘nalishlarda o‘zgarishlar yo‘q. Aviakompaniyaning “Bahor—yoz—2014” parvozlar jadvali joriy yilning 25-oktabriga qadar amal qiladi.
Izoh (0)