Statistika qoʻmitasi 2025-yil dekabr oyida Oʻzbekistonda qaysi tovar va xizmatlar narxlarida oʻsish kuzatilganini maʼlum qildi.
Oʻtgan oyda mamlakatdagi inflyatsiyaning oylik darajasi 0,9 foizni, yillik hisobi esa 7,3 foizni tashkil etdi. Bu oxirgi 9 yillik dekabrlarida kuzatilgan eng past narxlar oʻsishidir. Masalan, 2025-yil yanvarda yillik inflyatsiya darajasi 9,9 foiz boʻlgan.
Dekabr davomida mamlakatda oziq-ovqat mahsulotlari narxi 1,5 foizga, nooziq-ovqatlar 0,3 foizga, xizmatlar 0,7 foizga koʻtarilgan. Hududlar kesimida eng yuqori oylik inflyatsiya Xorazm viloyatida kuzatilgan (1,1 foiz) boʻlsa, yillik hisobda narxlarning yuqori oshishi Qoraqalpogʻiston va Fargʻona viloyatida qayd etilgan (7,7 foiz). Eng past yillik narxlar oʻsishi Qashqadaryo viloyatida (7 foiz) boʻlgan.
Statqoʻmga koʻra, dekabrda qator mahsulotlar narxi keskin oshgan. Masalan, bodring 55,7 foizga, baqlajon 55,9 foizga, pomidor 25,1 foizga, bulgʻor qalampiri 22,9 foizga, karam 22,8 foizga qimmatlashgan. Muhim oziq-ovqatlardan tuxum (+3,4 foiz), goʻsht (+0,5 foiz), sut va yogʻ (+0,4 foiz) narxlarida ham oʻsish kuzatilgan.
Oy davomida benzin 2,4 foizga, propan 1,3 foizga, aviachiptalar narxi 2 foizga oshgan. Oʻz navbatida uyali aloqa xizmatlari narxi ham 5,9 foizga, bank xizmatlari 3, foizga, chiqindi tashish 3 foizga koʻtarilgan.
2025-yil dekabrda yillik hisobda (2024-dekabriga nisbatan) gaz narxi 39,2 foizga, sovuq suv taʼminoti va kanalizatsiya xizmatlari 35,1 foizga, maishiy chiqindilarni olib ketish 32,5 foizga, suyultirilgan gaz 25 foizga, elektr energiyasi 18,8 foizga oshgan. Issiq suv taʼminoti 11,9 foizga, isitish xizmatlari 11,5 foizga qimmatlashgan. Benzin narxi bir yilda 11,9 foizga oshgan.
