Мадриднинг “Реал” клуби ҳужумчиси Килиан Мбаппе “Олтин тўп”га қанчалик муносиб эканлиги ҳақидаги саволга қайтарди. Унинг таъкидлашича, жорий йил ушбу мукофотни қўлга киритиш учун энг қулай палла ҳисобланади.
“ ‘Реал’ каби катта клубда ўйнасангиз, номингиз доимо ушбу соврин билан ёнма-ён тилга олинади. Одамлар ҳам шу ҳақда кўп гапиради. Тўғри, энг муҳим мусобақада тарихга кирдим, лекин ҳали қилинадиган ишлар кўп. Эҳтимол, ҳозир мукофотни қўлга киритишим учун энг қулай фурсатдир, бироқ энг зўрни танлашда ҳар кимнинг ўз қарашлари бўлади. Мен ўзимни ҳамиша энг яхшиси деб биламан, лекин фикрлар турлича бўлиши табиий”.
Мбаппе 2024-йилдан буён “Реал” шарафини ҳимоя қилиб келмоқда. У 2026-йилги Жаҳон чемпионатида Франция терма жамоаси сафида 8 та ўйинда майдонга тушиб, 10 та гол ва 4 та голли узатмага муаллифлик қилди ҳамда турнирнинг мутлақ тўпурарига айланди. Шу тариқа, Килиан футбол тарихида иккита мундиалда (2022 ва 2026-йиллар) энг яхши тўпурар бўлган илк ўйинчига айланди. Шунингдек, у жами 66 та гол билан Франция миллий терма жамоаси тарихидаги энг яхши тўпурар мақомини ҳам ўзида сақлаб турибди.
Маълумот ўрнида, бу йилги тақдирлаш маросими ўзига хос аҳамият касб этади. Мукофот ташкилотчилари — France Football нашри ва УЕФА 70 йил ичида биринчи марта тадбирни Франция пойтахтидан бошқа жойга кўчиришга қарор қилди. Маросим 26 октябрь куни Лондонда бўлиб ўтади.
