Непалда юз берган табиий офат сабаб туннел ичида қолиб кетган хитойлик фуқаро воқеадан 10 кун ўтиб қутқарилди. Непал армияси маълумотига кўра, Лу Ҳаитао 26 август куни юз берган тошқинлар сабаб Уппер Тришули-1 гидроэлектр станцияси лойиҳасининг 225 метрлик туннелида қолиб кетган.
У табиий офат оқибатида туннелга қамалиб қолган ягона инсон эмасди. Тахминларга кўра, тошқинлар ва тупроқ кўчкиси вақтида юзлаб инсонлар туннелдан чиқишга улгурмаган. Лу Ҳаитао эса бундайларнинг тирик ҳолда топилган учинчисидир. Воқеадан бир неча кун аввал қутқарувчилар айни шу дарёдаги Уппер Тришули 3А гидроэлектр станцияси туннелидан яна икки кишини олиб чиққанди.
Расмийларнинг айтишича, Луда кўзга ташланадиган оғир жароҳатлар топилмаган. Унинг ҳаётий кўрсаткичлари эса барқарор бўлган. Бироқ хитойлик эркакда енгил гипотермия белгилари аниқланган. Шу боис Луни вертолётда ҳарбий госпиталга олиб кетишган.
Фожиа ҳақида
26 август куни Ҳимолай ҳудудидаги улкан музлик қулаши ортидан кучли тошқин юзага келган. Непал табиий офатларни бошқариш идораси маълумотларига кўра, мамлакатда камида 1 344 киши ҳалок бўлган, яна 4 887 киши эса бедарак йўқолган. Улар орасида 583 нафар хориж фуқароси бор.
Хитой давлат ахборот агентлиги Sinxua хабарига кўра, Тибетда ҳам табиий офат оқибатида 31 киши ҳалок бўлган, 531 киши бедарак йўқолган. Рўйхатда 261 нафар хориж фуқароси бор.
Шанба куни Непал армияси Чандика Кумари Шрестҳа исмли аёлни ҳам Бетраватидаги сув босган уйидан тирик ҳолда қутқарган. Айни пайтда қутқарувчилар туннелларда қолиб кетган бошқа одамларни излашда давом этмоқда. “Дарё” Непалдаги воқеа Тожикистоннинг Сарез кўли ўртасида қандай умумий жиҳатлар ва фарқлар борлигини ўрганди.
