Испания Ла Лигасининг 4-тур учрашувлари доирасида “Валенсия” ва “Барселона” жамоалари ўзаро баҳс олиб борди. Валенсиядаги “Месталья” стадионида кечган учрашувда каталонияликлар рақибига ҳеч қандай имконият қолдирмади ва йирик 5:0 ҳисобида ғалаба қозонди.
Учрашув тақдири илк дақиқалардаёқ меҳмонлар фойдасига ҳал бўла бошлади. Ўйиннинг 6-дақиқасидаёқ “Барселона” вингери Ламин Ямал ҳисобни очди. 22-дақиқага келиб яримҳимоячи Фермин Лопес фарқни иккитага оширди.
Иккинчи бўлим бошида Рафинья жамоасининг учинчи голни уриб, ҳисобни йирик кўринишга келтирди. Ўйин якунига қадар каталонияликлар яна икки бор рақиб дарвозасини ишғол қилди: 79-дақиқада Педри ўз номини табло ёздириб қўйган бўлса, 84-дақиқада Ламин Ямал дубль расмийлаштириб, учрашувга якуний нуқтани қўйди — 5:0.
Бу “Барселона”нинг мавсумдаги кетма-кет тўртинчи ғалабаси ҳисобланади. Каталонияликлар айни пайтда 12 очко жамғарган ҳолда Ла Лига турнир жадвалида яққол пешқадамга айланиб олди. “Кўк-анорранглилар” ҳозирда энг яқин таъқибчилари бўлган “Бетис” ва “Реал Мадрид”ни 3 очкога ортда қолдирмоқда. Мавсум бошини омадсиз бошлаган “Валенсия” эса атиги 1 очко билан мусобақа жадвалининг сўнгги — 20-поғонасида бормоқда.
Чемпионатнинг навбатдаги турида “Барселона” 13 сентябрь куни сафарда “Леванте” билан ўйнайди. “Валенсия” эса 11 сентябрь куни “Севилья”га қарши баҳс олиб боради.
Испания Ла Лигаси, 4-тур
“Валенсия” — “Барселона” 0:5
Голлар: 0:1 — Ламин Ямал (6), 0:2 — Фермин Лопес (22), 0:3 — Рафинья (50), 0:4 — Педри (79), 0:5 — Ламин Ямал (84).
