“Сантос” ҳужумчиси Неймар Бразилия кубогидан тарк этгач, “Вила Белмиро” стадионидаги майдон ҳолатини кескин танқид қилди.
Бразилия Кубоги чоракфиналининг жавоб учрашувида “Сантос” “Палмейрас” билан 0:0 ҳисобида дуранг ўйнади. Бироқ илк ўйинда 0:3 ҳисобида мағлуб бўлган жамоа икки учрашув якунига кўра мусобақани тарк этди.
Неймар учрашувдан кейин сон қисмида ноқулайлик сезганини маълум қилди. Футболчи жароҳатининг жиддийлигини аниқлаш учун тиббий кўрикдан ўтади.
Бироқ бразилиялик футболчи майдон ҳолатига нисбатан эътироз билдирди. Унинг айтишича, учрашувдан бир кун олдин стадионда олиб борилган ишлар туфайли майдонда чуқурлар пайдо бўлган.
“Бу ерда кўрганим энг ёмон майдон эди. Ўйиндан бир кун олдин тупроқни юмшатишга қарор қилишибди. Натижада бутун майдон чуқур ва нотекис жойларга тўлиб кетди”, дейди Бразилия терма жамоаси собиқ футболчиси.
Унинг фикрича, футболчилар “Палмейрас”дан ташқари майдоннинг ёмон ҳолатига қарши ҳам курашишга мажбур бўлган. Нотекис майса тезланиш ва тўхташ пайтида футболчиларга ортиқча юклама берган.
Неймар биринчи бўлимнинг ўзида уч нафар футболчида жисмоний муаммолар юзага келганини ҳам таъкидлади. “Вила Белмиро” майдонининг ҳолати ўйиндан сўнг Бразилия матбуотида кенг муҳокамаларга сабаб бўлди.
Неймар 2025 йилдан буён “Сантос” клубида тўп тепмоқда. Футболчи жамоа билан 2026 йил охиригача шартнома имзолаган. Бразилиялик ҳужумчи, шунингдек, “Барселона”, “ПСЖ” ва Саудия Арабистонининг “Ал-Ҳилол” клубларида тўп тепган.
Неймар 2026 йилги Жаҳон чемпионатидан сўнг Бразилия терма жамоасидаги фаолиятини якунлаган эди.
