Бразилия чемпионатининг 23-турида “Сантос” сафарда “Васко да Гама”ни 3:0 ҳисобида мағлуб этди. Учрашувда Сан-Паулу клуби сўнгги 20 дақиқада учта гол уриб, муҳим ғалабани қўлга киритди.
Баҳсдаги энг эътиборли воқеалардан бири эса Неймарнинг янги қоида сабаб бир дақиқага майдонни тарк этгани бўлди.
“Сантос” дарвозабони Габриэль Бразао учрашув давомида тиббий ёрдам сўради ва шифокорлар майдонга чиқди. Бош ҳакам эса вазиятни вақтни чўзишга уриниш сифатида баҳолади.
Янги қоидага кўра, дарвозабонга тиббий ёрдам кўрсатилаётган пайтда жамоа мураббийи майдондаги футболчилардан бирини вақтинча алмаштириши керак. Агар 10 сония ичида футболчи танланмаса, жамоа сардори майдонни бир дақиқага тарк этади. Шу сабабли “Сантос” сардори Неймар вақтинча четга чиқарилди.
Мазкур қоида футбол учрашувларида жароҳат ва тиббий ёрдам баҳонасида вақт чўзилишининг олдини олишга қаратилган. У 2026-йилги Жаҳон чемпионатида қўлланила бошланган ва кейинчалик Бразилия чемпионатига ҳам жорий этилган.
Қоидада айрим истиснолар ҳам мавжуд. Масалан, дарвозабон жарима зарбасига сабаб бўлган вазиятда жароҳат олса, дарвозабон ва майдон футболчиси тўқнашиб, иккисига ҳам тиббий ёрдам керак бўлса ёки футболчидан қон кетаётган бўлса, бир дақиқалик четлатиш қўлланмайди.
Неймар эса учрашувни тўлиқ ўтказди ва “Сантос”нинг сўнгги икки голида бевосита иштирок этди. Ушбу ғалабадан сўнг жамоа 22 ўйинда 25 очко жамғариб, Бразилия чемпионатидаги қуйи лига зонасини тарк этди.
