Украина президенти Владимир Зеленский ўз офиси раҳбарининг ўринбосари Ирина Мудраяни лавозимидан озод қилди. Қарор Миллий аксилкоррупсия бюроси (NABU) нинг махсус операцияси ҳақидаги хабардан кейин эълон қилинди.
Зеленский 19 август куни “Мудрая Ирина Романовна Украина президенти офиси раҳбари ўринбосари лавозимидан озод этилсин” деган фармонни имзолаган. Қарор сабабига аниқлик киритилмаган. Бироқ UNIAN нашрининг ёзишича, бу Украинанинг коррупцияга қарши курашувчи органлари (NABU ва SAP) томонидан қўшма махсус операция ўтказилгани ортидан қабул қилинган. Натижада бир қатор сиёсий арбоблар бошчилигидаги жиноий ташкилот фош этилган.
Ушбу ташкилот Украинанинг амалдаги ва собиқ халқ депутатлари раҳбарлигида фаолият юритган. Шунингдек, унга президент офисининг юқори мартабали амалдорлари ва бошқа бир қатор шахслар жалб қилинган. Гап айнан кимлар ҳақида кетаётганига NABU аниқлик киритмаган.
Бироқ манбаларнинг “РБК-Украина”га маълум қилишича, иш бўйича эҳтимолий шахслар рўйхатида президент офиси раҳбари ўринбосари Ирина Мудрая, халқ депутати Вадим Столар ва собиқ халқ депутати Максим Микитас бўлиши мумкин. Бундан ташқари, депутат Алексей Гончаренко ҳам Ирина Мудраянинг уйида тинтув ўтказилаётганини айтган.
Украинадаги коррупция можароси
10 ноябрь куни “Энергоатом” давлат энергетика компанияси атрофидаги кенг кўламли коррупция схемаси фош этилган эди. Жанжал марказида Украинанинг амалдаги ҳукуматидаги бир нечта вазирлар, президентнинг узоқ йиллик сафдоши Тимур Миндич ва молиячи Александр Сукерман бўлган.
Ўша куни ҳуқуқ-тартибот идоралари Миндичнинг уйида, “Энергоатом”да ва Украина адлия вазири Герман Галушченконинг манзилида тинтув ўтказган. Миндич бунга қадар Украинани тарк этгани аниқланган.
12 ноябрь куни Зеленский адлия вазири Герман Галушченко ва энергетика вазири Светлана Гринчукни ишдан бўшатишни талаб қилди. Иккала вазир ҳам дарҳол истеъфога чиқиш тўғрисида ариза ёзди. 13 ноябрь куни эса президент Миндич ва Сукерманга қарши санкциялар жорий этиш тўғрисидаги фармонни имзолади.
Украина президенти офиси собиқ раҳбари Андрей Ермак эса Киев шаҳри яқинида “Династия” элита мажмуаси қурилишида 460 миллион гривна (10 миллион доллар)ни легаллаштириш иши бўйича гумонланмоқда. Сиёсатчи унга нисбатан айбловларни тан олмаган, унинг уйида тинтув ўтказилган.
Ермак 14 май куни тергов изоляторига жойлаштирилганди. Суд унга 140 миллион гривна (тахминан 3 миллион доллар) миқдорида гаров пули белгилаган. 18 май куни тегишли сумма йиғилган ва Ермак изолятордан чиқарилганди.
