Исроил 18 август куни Суриянинг Абу ад-Духур авиабазасига зарба берганини тан олиб, у ерда Туркия ҳарбийларининг жойлашишига йўл қўймаслик учун шундай қилганини таъкидлади.
Исроил бош вазири Биньямин Нетаньяхунинг идораси Сурия у билан хавфсизлик соҳасида эришилган келишувларни бузмоқчи бўлганини даъво қилмоқда. Туркия бу айбловларни рад этган, АҚШ президентининг Сурия бўйича махсус вакили Том Баррак эса Исроил ҳужумини керакcиз эскалация деб атаган.
Зарба 18 август куни эрталаб Туркия чегарасидан тахминан 70 километр узоқликдаги Идлибда жойлашган авиабазага берилган. Сурия давлат телевидениеси маълумотларига кўра, Исроил учиш-қўниш йўлаги ва омборхоналарга 8 та зарба йўллаган. База шикастланган, қурбонлар ва жабрланганлар ҳақида маълумот йўқ. Бу Исроилнинг март ойидан бери Сурия объектларига уюштирган биринчи ҳужуми ҳисобланади.
Ўша куни кечқурун Нетаньяхунинг идораси Исроил ва Сурия аввалроқ хавфсизлик масалаларида маълум бир “статус-кво”ни сақлаб қолишга келишиб олгани, бироқ Дамашқ ўз авиабазасига Туркия ҳарбийларни жойлаштиришга рухсат бериб, уни бузиш арафасида турганини билдирди.
Исроил Сурия ҳукуматини бундай қадам хавфсизликка таҳдид солиши ҳақида огоҳлантириб, бунга тоқат қилмаслигини билдирди. Туркия томони базага қўшин жойлаштирмоқчи бўлганини тасдиқламади.
Анқара нима демоқда?
Туркия президенти маъмуриятининг Коммуникациялар бошқармаси 19 август куни Нетаньяху идорасининг даъволарини асоссиз деб атади. Улар буни Суриянинг суверенитети ва ҳудудий яхлитлигига қарши қаратилган ноқонуний ҳаво ҳужумларини оқлаш деб баҳолади. Анқара, шунингдек, Нетаньяху идорасининг ҳаракатларини Исроилдаги бўлажак сайловлар билан боғлади. Туркия барқарорликни таъминлаш учун Сурия ҳукумати билан ҳамкорликни давом эттиришини таъкидлади.
Associated Press агентлигининг ёзишича, Туркия ҳарбийлари ҳақиқатан ҳам Абу-ад-Духур авиабазасига қизиқиш билдирган. Сурия расмийлари Исроил зарбасидан бир неча соат олдин Туркия ҳарбий делегацияси авиабазага ташриф буюрганини маълум қилди. База фуқаролар уруши пайтидаги жанглардан сўнг узоқ вақт давомида деярли ишлатилмаган. Аммо сўнгги пайтларда унинг фаолияти қайта тикланаётган эди. Financial Times нашрининг ёзишича, Туркиядан келган делегация ушбу ишларнинг боришини кўздан кечирган.
АҚШ базага ҳужумни танқид қилди
АҚШ президентининг Сурия бўйича махсус вакили ва Туркиядаги элчиси Том Баррак ҳужумлардан чуқур хавотирда эканини айтди. Шунингдек, буни минтақавий барқарорликка ҳисса қўшмайдиган керакcиз эскалация деб атади. Баррак томонларни вазминликка ва келишмовчиликларни музокаралар орқали ҳал қилишга чақирди.
Кейинроқ у Reuters агентлигига АҚШ Туркия, Исроил ва Сурия ўртасида можароларнинг олдини олиш механизмини яратиш устида ишлаётгани, бу эса томонларга ҳарбий фаоллик ҳақида маълумот алмашиш имконини беришини таъкидлади. АҚШ махсус вакилининг сўзларига кўра, Туркия базага зарба берилишини кутмаган ва бу Анқаранинг ҳарбий жавоби хавфини туғдирган.
