Эрон 17 август куни француз элчихонасининг икки ходимига мамлакатга қайтиш тақиқланганини билдирди. Улар июль ойида юзага келган дипломатик келишмовчиликка аралашган. Бу ҳақда Reuters хабар берди.
Эрон Ташқи ишлар вазирлиги матбуот котиби Исмоил Бақоийнинг таъкидлашича, улар Вена конвенциясини бузган. Вена конвенцияси дипломатик миссияларнинг қоидалари ва имтиёзларини белгилайди. Котибнинг сўзларига кўра, ходимлар Эрон фуқаролик жамиятини қўллаб-қувватловчи фаолият билан шуғулланган.
“Ушбу шахслар фуқаролик жамиятини қўллаб-қувватлаш билан шуғулланганини таъкидлашнинг ўзи Вена конвенцияси бузилганини тан олишдир”, деди Бақоий ҳафталик матбуот анжуманида.
У ушбу масалага батафсил тўхталмади. Терон Ғарб мамлакатларининг ички ишларга аралашувига азалдан салбий муносабат билдиради. Айниқса, февраль ойи охирида АҚШ ва Исроил Эронга ҳужум бошлаганидан бери вазият янада кескинлашган. Бу уруш ҳали ҳам давом этмоқда.
Франция ташқи ишлар вазири Жан-Ноэл Барро июль ойида France Inter радиостанциясига интервью бериб, икки ходимнинг вазифаси Эрон фуқаролик жамияти, талабалар ва санъаткорларни қўллаб-қувватлаш дастурларини ривожлантириш бўлганини айтган.
“Франция дунёда Эрон фуқаролик жамияти учун энг кўп иш қиладиган мамлакатлардан биридир. Биз бунинг эвазига бадал тўладик”, деган эди вазир.
Франция 21 июль куни Эроннинг муваққат ишлар вакилини чақиртирган. Бунга Эрон хавфсизлик кучларининг Теҳрондаги элчихона ходимларини ҳибсга олгани ва уларга нисбатан жисмоний тазйиқ ўтказгани сабаб бўлган.
Аввалроқ Руминия ҳаво ҳудудининг бузилиши сабаб Россия дипломатини ҳайдаб юборганио ҳақида хабар берилганди. Сабаби бу воқеадан олдин мамлакатга учта дрон кириб келган ва Бухарест бу воқеаларда Россияни айблаган.
