Россияда уруш қатнашчиларининг беваларига бепул ЭКУ ўтказиш ҳуқуқи берилади. Давлат Думаси тегишли қонун лойиҳасини иккинчи ва учинчи ўқишда қабул қилди.
Ҳужжатга мувофиқ, бу ҳуқуққа жанговар ҳаракатларда ҳалок бўлган ёки вафот этган ҳарбий хизматчилар ва ногиронларнинг қайта турмуш қурмаган аёллари эга бўлади. Ушбу хизматдан эрининг вафотидан кейин беш йил ичида фойдаланиш мумкин.
Бева аёл турмуш ўртоғининг биологик материалидан фойдаланиш учун унинг тириклик чоғида берган, нотариал тасдиқланган розилигини тақдим этиши керак. Бунда эркак исталган тиббиёт муассасасига олдиндан сперма топшириб, уни сақлаш учун қолдиради. Бу харажатларни эр-хотиннинг ўзи қоплайди. Қонун лойиҳасининг тушунтириш хатида қуйидагилар баён этилган:
“Эркаклар ватанни ҳимоя қилиш учун жуда эрта хизматга кетади, кўплари ҳали ота бўлишга улгурмайди. Турмуш ўртоғи ҳалок бўлган тақдирда, аёл ўз севган инсонидан фарзанд кўриш ва она бўлиш имкониятидан маҳрум бўлади”.
Шунинг учун Россиядаги “мураккаб демографик вазият”ни инобатга олиб, ЭКУ хизматларини бепул тақдим этиш кераклиги таъкидланган. Хизмат бепул тиббий ёрдам кўрсатишнинг давлат кафолатлари дастури доирасида тақдим этилади. Уни амалга ошириш тартибини эса Россия Соғлиқни сақлаш вазирлиги белгилайди. Қонун 2026 йил 1 декабрдан кучга киради.
Ҳозирда Мажбурий тиббий суғурта полиси бўйича ЭКУ фақат эр-хотиннинг бирида ёки иккаласида ҳам “бепуштлик” ташхиси бўлган оилавий жуфтликларга, шунингдек, шундай ташхисга эга ёлғиз аёлларга тақдим этилади.
Маълумот ўрнида, Россия президенти Владимир Путин 2023 йилда демографик муаммолар ҳақида гапирганди. Ўшанда у бир оилада етти-саккиз фарзанд бўлиши кераклигини айтган ва туғилиш даражасини кескин оширишга чақирганди.
