Хитойда бола уйда ўйнаб юрганида тасодифан ўнлаб мобил телефонларни ёқиб юборди. Улар орасида iPhone смартфонлари ҳам бўлган. Бу ҳақда South China Morning Post хабар берди.
Боланинг отаси Шэньчжэнь шаҳрида мобил телефонлар дўконини бошқаради. У қурилмаларнинг бир қисмини уйида сақлаб келган. Ёнғин Пенгнинг беш ёшли ўғли қисқа туташув содир бўлаётган узайтиргичдан чиқаётган учқунларни пайқаганида бошланган. Бола қизиқиб, улардан сочиқни ёқиш учун фойдаланган. Оқибатда олов тезда бутун устахонага тарқалиб, 30 га яқин телефонни йўқ қилган.
Уларнинг ярмидан кўпи iPhone бўлиб, ҳодиса оқибатида жами 200 000 юандан (салкам 29 минг 500 АҚШ доллари) ортиқ зарар етган. Пенгнинг бизнеси суғурталанмаган эди, шу сабабли молиявий зарар унинг ўзига тўғри келган.
Таъкидланишича, Пенг ёнғин пайти ухлаб ётган бўлган. Бола аланга отасига етиб боришидан хавотирланиб, бошқа хонага яширинишдан олдин у ётган хонанинг эшигини ёпиб қўйган.
“У мени уйғотмади. Ҳатто мен учун кондиционерни ҳам ёқиб қўйибди”, дейди Пенг.
У тутун ҳидидан уйғониб кетган ва ёнғинни ўчирган. Аммо устахона ва меҳмонхонанинг бир қисмига жиддий зарар етган. Болага ҳеч қандай зарар етмаган, у ҳодисадан кейин полни тозалашга ҳам ҳаракат қилган. Пенг ўғлига хитойча “wan huo zi fen” (ўт билан ўйнашган куяди) иборасини ўргатган ва: “Ортимдан қайтар. Буни ёдлаб олгач, бошқа бундай қилма”, деб уқтирган.
Отанинг таъкидлашича, ўғли унинг чекишини билган ҳолда устахонадан тўрт қути сигаретни сақлаб қолган. Пенг болалигида танбеҳ эшитишдан қанчалик қўрққанини эслаб, келгуси авлодга шундай қаттиққўллик қилишни истамаслигини айтди.
