АҚШ президенти Дональд Трамп Исроил бош вазири Бенямин Нетаньяхуни Эронга нисбатан ҳаракатларда эҳтиёткор бўлишга чақирди. Унинг таъкидлашича, агар вазият кескинлашса, Исроил АҚШ ёрдамисиз қолиши мумкин. Трамп бу ҳақда Исроилнинг Н12 телеканалига берган интервьюсида маълум қилди.
“Биби, ҳаракатларингда жуда эҳтиёт бўлишинг керак, чунки яқин орада Эронга қарши ёлғиз қолиб кетишинг мумкин’”, деган АҚШ президенти.
Трампнинг сўзларига кўра, АҚШ ва Эрон ўртасидаги музокараларда воситачилик қилаётган беш давлат ундан Нетаньяхуга босим ўтказишни сўраган.
“Улар Исроил ҳужумларини тўхтатиш учун биздан Тель Авивга таъсир ўтказишни сўради. Мен Бибига қўнғироқ қилдим ва уни бунга мажбур қилдим”, деган Трамп.
АҚШ президенти, шунингдек, айнан Эрон томони биринчи бўлиб Исроилга ҳужум қилмасликка ваъда берганини айтди.
“Исроил бизга янгиланган маълумотларни жуда кеч етказди. Улар аллақачон ҳужумга ўтганди. Мен ҳужум кўламини қисқартиришга эришдим”, деган Трамп.
Унинг таъкидлашича, Вашингтон ҳамон Теҳрон билан келишувга эришиш тарафдори бўлиб қолмоқда ва Эрон ҳам бундай битимни имзолашдан манфаатдор.
7 июнь куни кечқурун Эрон Исроилга ракета зарбалари берди. Бу ҳужум Исроил армиясининг Ливан пойтахти Байрут чеккасидаги “Ҳизбуллоҳ” инфратузилмасига уюштирган зарбасидан кўп ўтмай содир бўлди. Исроил ҳарбийлари ракеталарнинг бир қисми тутиб қолинганини ва жавоб зарбалари берилганини маълум қилган.
2 июнь куни Трамп Эрон билан ўт очишни тўхтатиш бўйича келишувга “келгуси ҳафта ичида” эришиш мумкинлигини билдирган эди. Ўша куни Эроннинг Tasnim агентлиги Теҳрон Исроилнинг Ливандаги ҳаракатларига норозилик сифатида воситачилар орқали олиб борилаётган музокараларни тўхтатганини хабар қилган.
4 июнь куни эса Исроил ва Ливан АҚШ воситачилигида ўт очишни тўхтатиш бўйича келишувга эришган эди.
8 июнь тонгида Трамп Нетаньяхуга икки марта қўнғироқ қилган. Шундан сўнг Исроил Эрон ҳудудига зарбаларни тўхтатган, бироқ Ливандаги амалиётларини давом эттиришини билдирган.
