Эрон футбол федерацияси мамлакат терма жамоаси ёзда бўлиб ўтадиган Жаҳон чемпионатида иштирок этишини маълум қилди. Бироқ Теҳрон турнир мезбонлари — АҚШ, Мексика ва Канададан бир қатор шартларни бажаришни талаб қилмоқда.
Яқинда Канада ҳукумати Эрон футбол федерацияси раҳбарини мамлакатга киритишни рад этган эди. Бунга унинг 2024-йилда террорчи ташкилот деб эълон қилинган Ислом инқилоби муҳофизлари корпуси (IRGC) билан алоқалари борлиги сабаб қилиб кўрсатилган. Қолаверса, Яқин Шарқдаги уруш ҳаракатлари фонида Эроннинг турнирдаги иштироки сўроқ остида қолаётган эди.
Федерация президенти Меҳди Тож давлат телеканали орқали мамлакатнинг асосий талабларини санаб ўтди. Унга кўра, барча футболчилар ва техник ходимларга, жумладан, IRGC’да ҳарбий хизматни ўтаган Меҳди Тареми ва Эҳсан Ҳожсафи каби ўйинчиларга ҳеч қандай муаммосиз виза берилиши шарт. Шунингдек, турнир давомида Эрон байроғи ва мадҳиясига тўлиқ ҳурмат кўрсатилиши лозим. Аэропортлар, меҳмонхоналар ва стадионларга борадиган йўлларда юқори даражадаги хавфсизлик чоралари таъминланиши керак.
“Биз жаҳон чемпионатида албатта қатнашамиз, бироқ ўз эътиқодимиз, маданиятимиз ва қарашларимиздан асло чекинмаймиз”, дейилади федерация баёнотида.
Ўз навбатида, АҚШ Давлат котиби Марко Рубио эронлик футболчилар яхши кайфиятда кутиб олинишини маълум қилди. Бироқ у ҳам IRGC билан алоқадор делегация аъзоларининг мамлакатга кириши тақиқланиши мумкинлигидан огоҳлантирди.
Маълумот ўрнида, Эрон терма жамоаси турнир давомида Аризона штатининг Тусон шаҳрида истиқомат қилиши кўзда тутилган. Жамоа “G” гуруҳидан жой олган бўлиб, Янги Зеландия, Бельгия ва Миср жамоаларига қарши майдонга тушади.
