Шимолий Кореянинг янги уран бойитиш мажмуаси тўлиқ қувват билан ишга тушса, мамлакатнинг уранни бойитиш салоҳияти ҳозирги даражага нисбатан 75 фоизга ошиши мумкин. Бу ҳақда The Wall Street Journal нашри Британияда жойлашган VERTIC таҳлилий маркази маълумотларига таяниб хабар берди.
Ҳисоботга кўра, Ёнгбён ядровий мажмуасида қурилган янги объектга 9 мингдан ортиқ центрифуга ўрнатилган бўлиши мумкин. Ушбу ядро иншооти йилига тахминан 160 килограмм юқори даражада бойитилган уран ишлаб чиқариш қувватига эга.
Таққослаш учун, экспертлар Шимолий Кореянинг мавжуд объектлари йилига қарийб 215 килограмм юқори даражада бойитилган уран ишлаб чиқараётганини тахмин қилмоқда.
VERTIC таҳлилчилари фикрича, Пхеньян аллақачон ўрта ҳажмдаги ядровий арсенални сақлаб туриш учун етарли материал захирасига эга. Бироқ янги объект ишга туширилиши билан бу имконият янада кенгаяди.
Тадқиқот ҳаммуаллифи Грант Кристофернинг айтишича, Шимолий Корея юқори даражада бойитилган ураннинг тахминан 2,1 тонналик захирасига эга бўлиши мумкин. Бу кўрсаткич Буюк Британия ёки Франция каби ядровий давлатлар ҳарбий захираларидан анча кам бўлса-да, мамлакатнинг ядровий салоҳияти мунтазам равишда ортиб бораётганини кўрсатади.
The Wall Street Journal қайд этишича, Ёнгбёндаги янги мажмуа фойдаланишга топширилгач, Шимолий Кореядаги оммага маълум бўлган энг йирик уран бойитиш иншоотига айланади.
Нашр экспертларга таяниб, бу кенгайиш Шимолий Корея раҳбари Ким Чен Ин АҚШ ва Хитой босимига қарамай, мамлакат ядровий дастурини сезиларли даражада кенгайтириш ниятида эканини кўрсатишини таъкидлади.
Сўнгги йилларда Шимолий Кореянинг ядровий дастури минтақадаги хавфсизликка оид хавотирларни кучайтирган. Пхеньяндан ядровий қурол дастурини тўхтатишни талаб қилиб келган Хитой ҳам кейинги пайтда бу масалани омма олдида деярли тилга олмаяпти. Ҳатто яқинда Пхеньянга ташриф буюрган Си Цзиньпин ҳам денуклеаризация мавзусига тўхталмади.
Таҳлилчиларга кўра, Ким Чен Иннинг ядровий арсенални кенгайтиришга қаратилган сиёсати АҚШ билан музокаралар истиқболлари тобора камайиб бораётганидан далолат беради. Аввалроқ Вашингтон Пхеньян ядровий дастурини қисқартириши эвазига санкцияларни юмшатишни таклиф қилган эди.
