Эбола вирусини юқтирган ўн бир киши Конго Демократик Республикасидаги (КДР) изолятордан қочиб кетди. Бу ҳақда мамлакат Соғлиқни сақлаш миллий институти ҳисоботига таяниб, Bloomberg хабар берди.
Маълум қилинишича, гап хавфли вирус тарқалишининг эписентри бўлган Итури провинцияси ҳақида кетмоқда.
“Эбола билан касалланган ўн бир бемор КДР шарқидаги изоляторлардан қочиб кетган”, дейилади хабарда.
Бир неча киши Катана шаҳарчасида Эбола касаллигидан вафот этган одамни дафн этаётган мутахассисларга ҳужум қилган. Оқибатда жасад солинган тобутни ташлаб кетишга тўғри келган. Бу касалликка чалиниш ҳолатларининг кўпайиш хавфини оширади. КДР ва қўшни Угандада 60 та ўлим ва вирусни юқтиришнинг 344 та ҳолати лаборатория орқали тасдиқланган.
Эболага чалинганларнинг қочиши билан боғлиқ ҳолат 22 май куни ҳам қайд этилганди. Ўшанда вирусдан даволанаётганлар шифохонаси ёқиб юборилган. Ҳодисага шифокорлар вафот этган беморнинг жасадини дафн қилиш учун оиласига топширмагани сабаб бўлган. Ғазабланган одамлар “Рвампара” марказий шифохонасининг бир қисмини ёқиб юборган.
Эболадан вафот этган шахснинг жасади ўта юқумли бўлиб, касаллик тарқалишига сабаб бўлиши мумкин. Шу сабабли расмийлар унинг хавфсиз дафн этилишини таъминлаши зарур.
Эбола қандай касаллик?
Касаллик биринчи марта 1976-йилда ҳозирги Конго Демократик Республикаси ҳудудида аниқланган ва кўршапалаклардан тарқалган деб тахмин қилинади. Бу мамлакатда юқори ўлим кўрсаткичига эга Эболанинг 17-марта авж олишидир. Кўршапалаклар вирус ташувчиси ҳисобланса-да, уларнинг ўзи бу касалликдан нобуд бўлмайди.
Касаллик танадаги суюқликлар (тер, сўлак, қон, она сути ва ҳ.к)билан бевосита контакт қилиш ёки жароҳатланган тери орқали юқади. У кучли қон кетиши ва ички аъзолар етишмовчилигига олиб келиши мумкин. Дастлабки аломатлар орасида иситма, мушак оғриғи, чарчоқ, бош ва томоқ оғриғи кузатилади. Кейинчалик кўнгил айниши, диарея, тошма ва қон кетиши бошланиши мумкин.
