Украина 3 июнь куни халқаро иқтисодий форум ўтказиладиган Россиянинг Санкт Петербург шаҳрига дронлар билан зарба берди. Ҳужум оқибатида “Петербург нефть терминали”да йирик ёнғин чиқди. Бу ҳақда “РБК-Украина” хабар берди.
Маълум қилинишича, Петербург портига уюштирилган ҳужум 3 июнга ўтар кечаси бошланган. Бугун шаҳарда хорижий тадбиркорлар ва делегациялар ташрифи кутилаётган халқаро иқтисодий форумнинг очилиш маросими бўлиб ўтади.
Ижтимоий тармоқларда ҳужумга учраган терминал акс этган кадрлар тарқалди. Видеода кучли портлаш товушлари эшитилгани ва осмонга қалин қора тутун кўтарилганини кўриш мумкин. Ҳужум туфайли нефть резервуарлари ёниб кетгани айтилмоқда.
Ленинград вилояти губернатори Александр Дрозденко эрталаб соат олтиларда шаҳар атрофида 30 та дрон уриб туширилгани ҳақида хабар берди. Бироқ у портдаги ёнғинга расмий изоҳ бермаган.
“Петербург нефть терминали” Россиянинг шимоли-ғарбидаги энг йирик нефть маҳсулотларини қайта юклаш мажмуасидир. Унинг умумий майдони 37 гектарни ташкил этади. Терминал ҳудудида нефть маҳсулотларини сақлаш учун 21 та резервуар мавжуд бўлиб, унинг қуввати йилига 12,5 миллион тоннани ташкил этади.
“СПАРК-Интерфакс” маълумотларига кўра, 2024 йилда Санкт Петербургдаги нефть терминалининг даромади 8,6 миллиард рубльни, соф фойдаси эса 5,8 миллиард рубльни ташкил этган. Эслатиб ўтамиз, Санкт Петербургда 3–6 июнь кунлари Петербург халқаро иқтисодий форуми бўлиб ўтади.
Россия шаҳарларига уюштирилган оммавий дрон ҳужуми 2 июнь куни Украинага берилган зарбалар ортидан амалга ошди. Киев, Харьков ва Днепрга турли хилдаги ракеталар ҳамда дронлар билан қилинган ҳужумда 10 дан ортиқ одам ҳалок бўлиб, юздан зиёд киши жароҳатланганди, улар орасида болалар ҳам бўлган.
