Франция 31 май куни Атлантика океанида санкцияга тушган Россия нефть танкерини қўлга олди. Операцияда унга иттифоқчилари, жумладан, Буюк Британия ёрдам берди. Бу ҳақда Франция президенти Эммануэл Макронга таяниб, BBC хабар берди.
Президентнинг сўзларига кўра, Франция ҳарбий-денгиз кучлари Тагор танкерига чиққан. Денгиз маъмуриятининг билдиришича, кема халқаро сувларда, Бриттани ярим оролидан тахминан 400 денгиз мили ғарбда ушланган. Ўша вақтда у сохта байроқ остида сузаётган бўлган.
“Кемаларнинг халқаро санкцияларни айланиб ўтиши, денгиз ҳуқуқини бузиши ва Россия тўрт йилдан ортиқ вақтдан бери Украинага қарши олиб бораётган урушни молиялаштириши қабул қилиниши мумкин эмас”, деб ёзди Макрон ўзининг X саҳифасида.
Россия муносабати
Кремль ушбу “ноқонуний” мусодирани “халқаро қароқчиликка яқин ҳаракат” деб баҳолади.
“Россия ўз юклари хавфсизлигини таъминлаш чораларини кўрмоқда”, деди Кремль матбуот котиби Дмитрий Песков.
Москва 2022-йилда Украинага қарши кенг кўламли урушни бошлаганидан бери ўз нефть экспортига қўйилган халқаро санкциялардан қочишга уринмоқда. Бунинг учун мамлакат эгалари яширин бўлган танкерлардан иборат “соялар флоти”дан фойдаланиб келади.
Бу Франция 2025 йил сентябрь ойидан бери бортига чиққан тўртинчи шундай кема бўлди. Макрон операция денгиз ҳуқуқига қатъий риоя қилинган ҳолда амалга оширилганини таъкидлади.
“Денгиз навигациясининг энг асосий қоидаларига риоя қилмайдиган бу кемалар атроф-муҳитга ва барчанинг хавфсизлигига ҳам таҳдид солади”, деди у.
Илгари Франция ҳукумати бундай кемаларнинг эгалари жарима тўлаганидан кейин ҳаракатни давом эттиришига рухсат берган. Бироқ энди вазият ўзгармоқда.
Британия позицияси
Британия бош вазири сэр Кир Стармер март ойида Британия ҳарбийларига санкция остидаги Россия кемаларига чиқишга рухсат берганини эълон қилган эди. Бироқ BBC Veritfy таҳлилидан аён бўлишича, бош вазир март ойи ўрталарида кемаларни тўхтатиш билан таҳдид қилганидан бери, 11 май ҳолатига кўра, Россия “соялар флоти”нинг 200 га яқин кемаси Британия сувларига кирган.
