Ўзбекистонлик ҳужумчи Шерзод Темиров Ироқнинг “Эрбил” жамоаси билан хайрлашди. Футболчи ўзининг Instagram саҳифасида клубдан кетишини эълон қилиб, мухлисларга хайрлашув мактубини ёзди.
“Барчага раҳмат. Бир йил давомида сизлар билан бир жамоада тўп тепганимдан жуда бахтлиман. Мени қўллаб-қувватлаган ‘Эрбил’ клуби мураббийлар штаби, президенти, раҳбарияти ва мухлисларига ўз миннатдорчилигимни билдираман. Барчангизни яхши кўраман”, деб ёзади Темиров.
Маълумот учун, Темиров клуб сафида бир йил давомида барча турнирларда жами 34 та учрашувда майдонга тушиб, 29 та гол уришга муваффақ бўлди. Ҳужумчи голларининг 28 тасини айнан ички чемпионатда киритиб, Ироқ лигасининг энг яхши тўпурарига айланди. Унинг жамоаси эса мусобақа якунида бронза медалларига эга чиқди.
Айрим маълумотларга кўра, Шерзод Темиров Ўзбекистон Суперлигасидан қайтиши мумкин. Ҳужумчи катта эҳтимол билан Тошкентнинг “Пахтакор” клуби билан шартнома имзолайди.
Эслатиб ўтамиз, Шерзод Темиров Ўзбекистон миллий терма жамоасининг Шимолий Америкадаги Жаҳон чемпионати учун эълон қилинган кенгайтирилган таркибидан жой олган. “Оқ бўрилар” мундиал олдидан сўнгги тайёргарлик босқичини ўташ учун 26 май куни Нью Йоркка йўл олади.
