“Манчестер Сити” тарихидаги энг яхши тўпурарлардан бири Серхио Агуэро жамоанинг ўзбекистонлик ҳимоячиси Абдуқодир Ҳусановнинг ўйин услуби ва келажаги борасида ўз фикрлари билан ўртоқлашди.
Аргентиналик форварднинг таъкидлашича, Ҳусанов ҳозирда улкан салоҳиятга эга, бироқ жаҳон даражасидаги юлдузга айланиш учун унга барқарорлик керак:
“Ҳусанов — тезкор ва тажовузкор ўйинчи, унинг ҳаракатлари менга ёқади. Лекин биз унинг вақт ўтиши билан қандай ривожланишини кузатишимиз лозим. Мен ҳар доим футболчининг маҳоратини унинг даражасини қанча муддат сақлаб тура олишига қараб баҳолайман. Агар у ушбу спорт формасини яна 3–4 йил давомида ушлаб турса, дунёнинг энг кучли ҳимоячиларидан бирига айланади”, дейди Агуэро.
Шунингдек, Агурео Ҳусановнинг жамоа таркибидаги ўрнига ҳам тўхталиб ўтди. Унинг фикрича, ўзбекистонлик ҳимоячининг “Сити” сафида бўлиши жамоа учун катта аҳамиятга эга.
“У ҳозирда катта имкониятга эга ва шу зайлда давом этиши керак. Бугунги кунда ҳар йили юқори даражада ўйнайдиган ҳимоячилар кўп. Ҳусановнинг таркибдалиги жамоа учун кўп нарсани англатади. Ҳар ҳолда жорий мавсумда кўрганларимиз шундан далолат бермоқда”, дея қўшимча қилди аргентиналик футбол юлдузи.
Маълумот учун, Абдуқодир Ҳусанов жорий мавсум “Манчестер Сити” сафида жами 34 та учрашувда майдонга тушиб, 5 та сариқ карточка билан жазоланган. Унинг “шаҳарликлар” билан шартномаси 2029 йилнинг ёзига қадар амал қилади. Transfermarkt портали футболчининг қийматини 35 миллион еврога баҳоламоқда.
