Мадриднинг “Реал” клуби кийим алмаштириш хонасида келишмовчиликлар юзага келди. Сабаби Испания матбуоти ва ижтимоий тармоқларда жамоанинг икки асосий юлдузи — Килиан Мбаппе ҳамда Винисиус Жуниор ўртасидаги муносабатлар кескинлашгани ҳақидаги хабарлар кўпайди.
Таниқли инсайдер Франсуа Галлардо берган маълумотга кўра, франциялик форвард баъзи жамоадошлари, хусусан, Винисиусни сотқинликда айбламоқда. Вазият шу даражага етганки, Мбаппенинг онаси ва агенти Файза Ламари ёзда клуб президенти Флорентино Пересга қатъий ультиматум қўйишга ҳозирлик кўрмоқда.
Галлардонинг таъкидлашича, Мбаппе атрофидаги шахслар масалани кўндаланг қўйиши мумкин:
“Ё “Реал” Винисиус билан хайрлашади, ёки жамоани Мбаппенинг ўзи тарк этади”.
Бу хабарлар ўз-ўзидан пайдо бўлгани йўқ. Аввалроқ, жамоанинг баъзи етакчи футболчилари Мбаппенинг “Барселона” билан муҳим ўйин арафасида Италияга қилган саёҳатидан норози бўлгани ҳақида хабарлар тарқалган эди. Ҳозирча на клуб раҳбарияти, на футболчиларнинг вакиллари ушбу маълумотларга расмий муносабат билдирди. Бироқ Испания нашрлари бу хабарни “Мадридда кутилаётган катта портлаш” сифатида баҳоламоқда.
Маълумот ўрнида таъкидлаш жоизки, жорий мавсум “Қироллик клуби” учун ниҳоятда омадсиз кечмоқда. Мадридликлар аллақачон Испания кубоги ва Чемпионлар лигаси билан хайрлашиб улгурган бўлса, Ла Лигадаги чемпионлик пойгасида ҳам имкониятлар деярли қўлдан чиққан.
