Хитойлик муҳандислар хизматкор-робот яратишди. Дастурчиларнинг таъкидлашича, у уй юмушларининг катта қисмини бажариши, жумладан, овқат тайёрлаши, кийимларни тахлаши ва ҳатто болалар тарбиясида кўмаклашиши мумкин. Шунинг учун уни энага, курер ва уй хизматчисининг ўрнини боса олади, дейиш мумкин.
KAI деб номланган ушбу гуманоид-робот Хитойнинг Kinetix AI компанияси томонидан ишлаб чиқилган. Компания сайтида келтирилишича, лойиҳа устида сунъий интеллект соҳасидаги дунёнинг етакчи мутахассислари иш олиб борган.
Роботнинг бўйи 173 см, вазни эса 70 кг ни ташкил этади. Яратувчиларнинг сўзларига кўра, гуманоид вазиятни мустақил баҳолаш, қарор қабул қилиш ва одамлар билан мулоқотга киришиш қобилиятига эга.
