Колумбия велоспорт федерацияси матбуот хизмати 30 ёшли спортчи Кристиан Камило Мунёснинг вафот этганини маълум қилди.
Фожиа Францияда ўтказилган “Tour du Jura” пойгасида юз берган. 18 апрель кунги баҳсларда Мунёс йиқилиб тушиб, тиззасидан жароҳат олган. Дастлаб хавфли кўринмаган ушбу жароҳат ортидан шифокорлар спортчида даволаш қийин бўлган инфекцияни аниқлашган. Шифокорларнинг уринишларига қарамай, сўнгги кунларда унинг аҳволи кескин ёмонлашган ва у ҳаётдан кўз юмган.
“Колумбия велоспорт федерацияси ва унинг ижроия қўмитаси ўтган шанба кунги ҳалокатдан сўнг юзага келган асоратлар туфайли ‘NU Cоlоmbia’ жамоаси аъзоси Камило Мунёснинг вафоти муносабати билан чуқур таъзия билдиради. Унинг вафоти колумбиялик велоспорт ишқибозлари ва уни яқиндан таниганлар қалбидан чуқур жой олди. Кристиан ўзининг интизоми ва қатъияти билан барчамизнинг хотирамизда қолади”, дейилади федерация хабарида.
Эслатиб ўтамиз, аввалроқ Самарқанднинг “Динамо” клуби U-19 жамоаси аъзоси, 18 ёшли Сардор Муродов вафот этгани ҳақида хабар берилган эди.
