УЕФА президенти Александер Чеферин футбол мухлислари каби ўзи ҳам ҳакамларнинг “қўл билан ўйин” ҳолатларини турлича баҳолаётганидан чарчаганини тан олди.
Яқинда “Барселона” ЕЧЛ чорак финалида “Атлетико Мадрид”га қарши кечган ўйинлардаги ҳакамлик устидан УЕФАга шикоят қилган эди. Биринчи баҳсда (0:2) мадридликлар дарвозабони Хуан Муссо тўпни шеригига узатган, ҳимоячи Марк Пубил эса уни қўли билан тўхтатиб, яна дарвозабонга қайтарган. Ҳакам Иштван Ковач бу яққол ҳолатда пенальти белгиламаган, VAR эса аралашмаган. УЕФА “кўк-анорранглилар”нинг ушбу шикоятини рад этди.
Мадридда ўтган The Forum конференциясида нутқ сўзлаган Чеферин қоидаларнинг турлича талқин қилиниши бўйича ўз фикрлари билан ўртоқлашди:
“Мухлислар нега қоидалар ҳар ўйинда турлича талқин қилинишини тушунмаяпти ва мен улар қаторидаман. Тўғриси, мен ҳам бу борада ҳеч нарсага тушунмай қолдим. Масалан, қўл билан ўйинни олайлик — ҳеч ким қачон пенальти берилиши, қачон берилмаслигини билмайди. Тўп қўлга атайлаб тегдими ёки йўқми. Буни қандай аниқлаш мумкин? Ҳакам психиатр эмас-ку!”, деди УЕФА раҳбари.
Шунингдек, Чеферин видеоассистентлар (VAR) ишига ҳам тўхталиб ўтди. Унинг фикрича, тизим фақат “яққол ва очиқ-ойдин” хатолар бўлгандагина аралашиши керак:
“Биз ҳакамларга қарорни майдоннинг ўзида қабул қилиш кераклигини тушунтиряпмиз. VAR’нинг аралашуви қисқа бўлиши лозим. Ла Лига ёки Англия Премьер Лигасидагидек, битта вазиятни текшириш учун ўйинни 10–15 дақиқага тўхтатиб қўйиш керак эмас”.
