Японияда тонгги ҳаракатсизлик ва бўйин оғриқлари муаммосини ҳал қилишга мўлжалланган ноёб ёстиқ — Мirakuru Pillоw тақдим этилди. Янгилик олтита ички ҳаво камераси билан жиҳозланган бўлиб, улар тун давомида бир маромда шиширилади ва бўшатилади. Бу ухлаётган одамнинг бошини сездирмай ҳаракатлантиради, бунинг натижасида босим нуқталари ўзгаради ва мушакларда қотиб қолишнинг олди олинади.
Гаджет ихтирочиси, Япониядаги энг йирик “Риракуру” массаж салонлари тармоғининг асосчиси Юкихиро Такеноучи кўп йиллар давомида мижозларини кузатиб, ушбу қурилмани яратиш ҳақида ўйлаган. Унинг қайд этишича, ҳатто сифатли массаждан кейин ҳам одамлар уйқу пайтидаги ҳаракатсизлик туфайли эрталаблари бош оғирлигидан шикоят қилишар экан.
Mirakuru Pillow ёстиғидан фойдаланиш жуда осон: унинг мобил иловаси ёки мураккаб созламалари йўқ. Барча бошқарув ташқи контроллерга чиқарилган бўлиб, уни каравот ёнидаги тумбага қўйиш мумкин. Ёстиқнинг ўзи эса контроллерга ингичка найча орқали уланган. Тизимни ишга тушириш учун ухлашдан олдин тугмани босиш кифоя.
Ишлаб чиқувчилар қулайликка алоҳида эътибор қаратган. Пневматик тизим шовқинсиз ишлайди — унинг даражаси 50 дБ дан ошмайди, шу боис ҳаво камераларининг ҳаракати на эгасини, на унинг ёнида ухлаётган кишини уйғотиб юборади. Ёстиқнинг ўзи тахминан 4,2 кг, бу эса унинг матрас устида барқарор туришини таъминлайди. Дастлабки етказиб бериш шу йилнинг июнь ойига режалаштирилган, нархи 261 долларни ташкил қилади.
