Эрон делегацияси АҚШ билан музокара ўтказиш учун 20 апрель куни олий раҳнамо Можтаба Хоманаийдан “яшил чироқ” олди. Бу ҳақда Axios манбага таяниб хабар берди.
Оқ уй 20 апрель куни давомида Теҳрондан Эрон музокарачиларининг Исломободга йўл олиши ҳақидаги сигнални кутган. Покистон, Миср ва Туркия ҳам уларни музокараларга ундаган. Бироқ Эрон томони Ислом инқилоби қўриқчилари корпуси босими билан вақтни чўзган. Улар делегатлардан қатъий позицияни эгаллашни, жумладан, АҚШ денгиз блокадасини тўхтатмагунча ҳеч қандай музокаралар ўтказмасликни талаб қилган.
Энди Исломободдаги учрашувга АҚШ делегациясига биринчи раундда раҳбарлик қилган вице-президент Жей Ди Венс ҳам бориши кутилмоқда. Унинг парвози 21 апрель тонгига режалаштирилган, бироқ айрим маълумотларга кўра, у 20 апрель кечаси (АҚШ вақти билан) аллақачон йўлга чиққан бўлиши мумкин.
Шунингдек, музокараларда иштирок этиш учун Исломободга Дональд Трампнинг махсус вакиллари Стив Уиткофф ва куёви Жаред Кушнер ҳам бориши кутилмоқда.
АҚШ ва Эрон музокаралари
Томонлар ўртасидаги музокараларнинг биринчи босқичи 11-12 апрель кунлари Исломободда бўлиб ўтди, бироқ у ҳеч қандай натижасиз якунланди. Бир ҳафта ўтгач, Эрон тўсиб қўйилган Ҳурмуз бўғозини тижорат кемалари учун очишини эълон қилди, бироқ тез орада уни қайта ёпди.
Шу билан бирга, АҚШ Ҳормузни блокада қилишни бошлади ва бўғоздан ўтадиган кемалар Эронга тўлов қилса, таʻқиб қилинишидан огоҳлантирди. АҚШ 19 апрель куни Уммон кўрфазида сузаётган Эрон кемасини ўққа тутиб, қўлга олди. Кема Эрон Бандар-Аббос порти томон йўл олаётганди. Бунга жавобан Эрон АҚШнинг ҳарбий кемаларига ҳужум қилганини таʻкидлади.
Томонлар ўртасида келишилган икки ҳафталик сулҳ 21 апрелда тугаса-да, Трамп охирги муддат 22 апрель оқшоми эканини маълум қилди. Шу билан бирга, АҚШ раҳбари сулҳнинг узайтирилиши эҳтимолдан йироқ эканини айтмоқда.
