Каталониянинг “Барселона” клуби “Манчестер Юнайтед”дан ижарага олинган ҳужумчи Маркус Рэшфорднинг тўлиқ трансфери борасида музокараларни давом эттирмоқда. Бу ҳақда инсайдер Рашад Раҳман ўзининг X (собиқ Twitter) саҳифасида маълумот берган.
Маълум қилинишича, “Барселона” раҳбарияти ва жамоа бош мураббийи Ҳанси Флик инглиз ҳужумчисининг ўйинидан тўлиқ қониқмоқда. Футболчининг ўзи ҳам фаолиятини Испанияда давом эттириш истагини билдирган. Бироқ, “Манчестер Юнайтед” трансфер борасида ўз позициясидан қайтмаяпти. Инглиз клуби футболчи учун қатъий равишда 30 миллион евро талаб қилмоқда. Акс ҳолда, Рэшфорд мавсум якунида “Олд Траффорд”га қайтиши шарт. Каталонияликлар молиявий муаммолар сабабли трансфер учун “креатив ечимлар” (турли бонуслар ёки тўловни бўлиб бериш) таклиф қилган, бироқ “Манчестер Юнайтед” раҳбарияти буни рад этган.
Маълумот учун, Маркус Рэшфорд 2025-йилнинг ёзидан буён ижара асосида “Барселона” шарафини ҳимоя қилмоқда. Жорий мавсумда ҳужумчи барча турнирлар доирасида жами 43 та ўйинда майдонга тушиб, ўз ҳисобига 12 та гол ва 13 та голли узатмани ёздириб қўйган. Transfermarkt портали Рэшфорднинг қийматини 40 миллион еврога баҳоламоқда.
