Туркиянинг Шонлиурфа провинциясида номаълум шахс мактабга қуролли ҳужум уюштирди. Бу ҳақда Hurriyet хабар берди.
Ҳужум оқибатида 16 киши жароҳатлангани айтилмоқда. Ҳодиса Аҳмет Коюнжу номидаги Анадолу касб-ҳунар ўрта мактабида юз берган. Мактабдаги ўқувчиларнинг аксарияти эвакуация қилинган. Ҳудудга тиббиёт, полиция ва бошқа махсус бўлинмалар юборилган.
Гувоҳнинг сўзларига кўра, ҳужум қилган шахс 17-18 ёшли ўсмир бўлган. У ўрта мактаб ҳудудига узун стволли қурол билан кирган.
“Аввал у мактаб ҳовлисида тартибсиз ўт очган, кейин эса тўғридан тўғри мактабга ҳужум уюштирган”, деди манба.
Расмийлар нима демоқда?
Шонлиурфа ҳокими Ҳасан Шилдакнинг айтишича, ҳужум қилган шахс 2007 йилда туғилган бола бўлиб, полиция томонидан қуршаб олингач, ўз жонига қасд қилган.
У мактабнинг собиқ ўқувчиси бўлиб, фақат тўққизинчи синфгача таълим олган, кейинчалик сиртқи таълимга ўтган. Бош прокуратура зарур суд жараёнларини бошлаб юборган
“Ярадорларнинг аҳволини диққат билан кузатиб боряпмиз ва барчасига Аллоҳдан шифо тилаб қоламиз”, деди Ҳасан Шилдак.
