“Манчестер Сити” мутасаддилари ёзги трансфер ойнаси вақтида “Брентфорд” ҳимоячиси Микаел Кайоде билан шартнома имзолаш учун бор имкониятини ишга солмоқчи. Бу ҳақда Теам Talk нашри хабар берди.
Қайд этилишича, Кайодени сотиб олиш, ҳатто бош мураббий Хосеп Гвардиоланинг жамоани тарк этиши мумкинлиги ҳақидаги хабарларга қарамай, Манчестер клуби учун устувор вазифа ҳисобланади. Бироқ, агар мутахассис ўз лавозимида қолса, “шаҳарликлар”нинг футболчини қўлга киритиш имконияти янада юқори бўлади.
Италиялик футболчи Европанинг энг истиқболли ёш ҳимоячиларидан бири сифатида кўрилмоқда. Унинг трансфери учун курашга “шаҳарликлар”дан ташқари “Манчестер Юнайтед” ва бошқа топ-клублар ҳам қўшилган.
Ўтган ёзда “Фиорентина”дан 15 миллион фунт эвазига “Брентфорд” сафига ўтган 21 ёшли ўнг қанот ҳимоячиси қисқа вақт ичида жамоанинг асосий футболчисига айланди. Кайоденинг тезкорлик, жисмоний бақувватлик ва аутдан тўпни узоққа ташлаш қобилиятини ўзида мужассам этган динамик ўйин услуби кўпчиликнинг эътирофига сазовор бўлди.
АПЛдаги барқарор ўйинлари сабаб унинг бозор қиймати кескин кўтарилди. Клубдаги манбаларнинг хабар беришича, футболчи 60 миллион фунтдан ортиққа баҳоланмоқда. “Брентфорд”да унинг жаҳон даражасидаги юлдуз бўлиб етишишига катта ишонч билдирилмоқда.
Бироқ футболчи учун кураш фақат Манчестер клублари билан чекланиб қолмаган — Премьер Лиганинг яна учта жамоаси ва Европанинг бешта гиганти ҳам пойгага қўшилган. “Ньюкасл”, “Тоттенҳэм”, “Арсенал”, “Реал Мадрид”, “Бавария”, ПСЖ, “Ювентус” ва “Интер” клублари Каёде билан боғлиқ вазиятни диққат билан кузатиб бормоқда.
Яқинда футболчининг агенти “Фиорентина” ва “Брентфорд”дан кейин унинг фаолиятида “учинчи қадам” бўлишига шаъма қилди. Бу эса унинг катта клубга ўтиши ҳақидаги миш-мишларни янада кучайтирди. Ҳозирча расмий таклифлар тушмаган бўлса-да, “Брентфорд” ўз юлдузини таркибда сақлаб қолишга ҳаракат қилмоқда.
Transfermarkt маълумотларига кўра, Кайоденинг бозор қиймати 27 миллион еврони ташкил этади.
Шунингдек, “шаҳарликлар” ўзбекистонлик ҳимоячи Абдуқодир Ҳусановнинг жамоадоши — “Ланс”нинг 22 ёшли австриялик марказий ҳимоячиси Самсон Байду учун “Ливерпуль” билан рақобатлашиши кутилмоқда.
