Американинг ESPN нашри Англия Премьер Лигаси тарихидаги энг муваффақиятсиз 10 та трансфер рейтингини эълон қилди. Мазкур антирейтингнинг энг юқори поғонасидан Лондоннинг “Челси” клуби ярим ҳимоячиси Михайло Мудрик жой олди.
Украиналик вингер 2023-йилнинг қишида Донецкнинг “Шахтёр” клубидан “Челси”га тахминан 70 миллион евро эвазига ўтган эди. Бу трансфер ўша вақтда украиналик футболчилар учун рекорд кўрсаткич сифатида қайд этилган. Бироқ Мудрик Лондон клубининг асосий таркибида ўз ўрнини топа олмади. Вазиятни кейинчалик юзага келган допинг можароси янада оғирлаштирди. Футболчи тақиқланган моддалар истеъмол қилганликда айбланиб, ўйинлардан четлатилди. Айнан мана шу омиллар унинг трансферини АПЛ тарихидаги энг ёмони деб топилишига сабаб бўлди.
Шунингдек, “Манчестер Юнайтед” аъзоси Антони ҳамда “Арсенал”нинг собиқ футболчиси Николя Пепе “кучли учлик”ни якунлаб берган.
ESPN талқинига кўра АПЛ тарихидаги энг ёмон 10 та трансфер:
- Михайло Мудрик — “Шахтёр”дан “Челси”га;
- Антони — “Аякс”дан “Манчестер Юнайтед”га;
- Николя Пепе — “Лилль”дан “Арсенал”га;
- Али Диа — эркин агент сифатида “Саутгемптон”га;
- Дэнни Дринкуотер — “Лестер”дан “Челси”га;
- Рикки Алварес — “Интер”дан “Сандерленд”га;
- Ромелу Лукаку — “Интер”дан “Челси”га;
- Жейдон Санчо — “Боруссия Д”дан “Манчестер Юнайтед”га;
- Томас Бролин — “Парма”дан “Лидс”га;
- Калвин Филлипс — “Лидс”дан “Манчестер Сити”га
