Франциянинг нуфузли L’Équipe нашри Англия Премьер Лигасида энг кўп ойлик маош оладиган топ-5 футболчи рўйхатини тақдим этди. Рейтингда “Манчестер Сити” ҳужумчиси Эрлинг Ҳоланд пешқадамлик қилмоқда — унинг бир ойлик маоши 2,63 млн еврони ташкил этади.
Рўйхатнинг иккинчи поғонасидан ёзда “Ливерпуль”ни тарк этиши кутилаётган Муҳаммад Салоҳ жой олган. Мерсисайдликлар мисрлик футболчи учун ойига 2 млн евро маош тўлайди. Кучли учликни эса “Манчестер Юнайтед” ярим ҳимоячиси Каземиро якунлаб берган — 1,75 млн евро.
АПЛда энг кўп маош олувчи футболчилар (ойига):
- Эрлинг Ҳоланд (“Манчестер Сити”) — 2,63 млн евро;
- Муҳаммад Салоҳ (“Ливерпуль”) — 2 млн евро;
- Каземиро (“Манчестер Юнайтед”) — 1,75 млн евро;
- Виржил ван Дейк (“Ливерпуль”) — 1,75 млн евро;
- Бруну Фернандеш (“Манчестер Юнайтед”) — 1,5 млн евро;
- Букайо Сака (“Арсенал”) — 1,5 млн евро.
Ўзбекистонлик ҳимоячи Абдуқодир Ҳусанов рўйхатдан жой олмаган. Аммо Capology порталида футболчининг “Манчестер Сити”даги йиллик даромади 3,8 миллион евро этиб белгиланган. Бу унинг ойига 316 минг, ҳафтасига эса 73 минг евро даромад топишини англатади. Ҳусанов ва “Манчестер Сити” ўртасидаги келишув 2025 йил 20 январда имзоланган бўлиб, келишув 2029 йил 30 июнга қадар амал қилади. Тўрт йиллик умумий шартнома қиймати бонуслар билан бирга тахминан 15,2 миллион еврони ташкил этади.
Маълумот учун, Англия чемпионатнинг 31-туридан сўнг турнир жадвалида “Арсенал” 70 очко билан пешқадамлик қилмоқда. “Манчестер Сити” эса бир ўйин кам ўтказган ҳолда 61 очко билан иккинчи ўринда бормоқда. Кучли тўртликни мос равишда “Манчестер Юнайтед” (55 очко) ва “Астон Вилла” (54 очко) якунлаб турибди.
