АҚШ президенти Дональд Трамп икки суткадан сўнг Эронга “дўзах ёғилиши”ни айтди. У бу ҳақдаги огоҳлантиришни ўзининг Truth Social ижтимоий тармоғида эълон қилди.
“Эсингиздами, Эронга келишув тузиши ёки Ҳормуз бўғозини очиши учун ўн кун муҳлат бергандим? Вақт тугаяпти — 48 соатдан кейин уларнинг бошига дўзах олови ёғилади”, деди Трамп.
3 апрель куни The Wall Street Journal ўз манбаларига таяниб, Покистон воситачилигида АҚШ ва Эрон ўртасида сулҳ битимини тузишга бўлган уриниш барбод бўлганини хабар қилди. Эрон вакиллари АҚШ билан музокара ўтказиш ниятида эмаслигини ва у илгари сураётган тинчлик шартларини номақбул деб ҳисоблашини таъкидлади.
Экспертларга кўра, Эрон ҳам урушни тўхтатиш учун Қўшма Штатларга амалда бажариб бўлмайдиган шартларни илгари сурмоқда. Бу шартлар очиқланмаган, бироқ Теҳрон тинчлик битими учун келгусида ҳужум қилмаслик бўйича хавфсизлик кафолати ҳамда етказилган зарар учун компенсация талаб қилиб келаётганди.
Трамп 1 апрелдаги мурожаатида Ҳормуз бўғози орқали кемалар ўтишини тартибга солиш масаласини бундан энг кўп манфаатдор бўлган давлатлар ўз зиммасига олиши кераклигини айтди. У Қўшма Штатлар бу борада фақат ёрдам беришга тайёрлигини билдирди. Бироқ орадан икки кун ўтгач, Трамп АҚШга яна бир оз вақт кераклигини ҳамда улар “ҳеч қандай қийинчиликсиз” Ҳормуз бўғозини очиб, “нефтни олиб, бойлик орттира олишини” маълум қилди.
Reuters билан суҳбатлашган экспертларнинг таъкидлашича, Ҳормузни очиш учун куч ишлатишга уриниш Трамп бир неча ҳафта ичида тугатмоқчи бўлган Эрон билан урушнинг узоқ давом этишига олиб келиши мумкин. АҚШ разведкаси эса Эрон яқин орада бўғозни ихтиёрий равишда очишини эҳтимолдан йироқ деб баҳоламоқда. Чунки Ҳормузни назорат қилиш Теҳрон учун АҚШга босим ўтказишнинг асосий воситаларидан бири ҳисобланади.
