Қирғизистон Миллий хавфсизлик давлат қўмитаси собиқ раиси Қамчибек Ташиевнинг укаси Шоирбек Ташиев 1 апрель куни қўлга олинди. Бу ҳақда Ички ишлар вазирлиги хабар берди.
Шоирбек Ташиев “Қирғизнефтгаз”даги талон-торож иши бўйича коррупцияда гумон қилинмоқда.
Вазирлар Маҳкамаси ҳузуридаги Давлат солиқ қўмитаси материаллари ва аудиторлик текшируви асосида “Қирғизнефтгаз” ОАЖда коррупция факти бўйича қўзғатилган жиноят иши доирасида Ички ишлар вазирлиги томонидан жиноят ишини тергов қилиш жараёнида илгари Қирғизистон Жўқорғи Кенеши депутати лавозимида ишлаган Шоирбек Ташиев қўлга олинди, дейилади расмий хабарда.
Қўлга олинган шахс Бишкекдаги вақтинча сақлаш ҳибсхонасига жойлаштирилган. Аввалроқ Шоирбек Ташиевнинг депутатлик мандати бекор қилиниб, депутатлик гувоҳномаси ҳақиқий эмас деб топилганди.
Қамчибек Ташиевнинг ишдан олиниши
10 февраль куни Қамчибек Ташиев Қирғизистон Миллий хавфсизлик давлат қўмитаси раиси лавозимидан озод этилди. Тегишли фармонни республика президенти Садир Жапаров имзолади. У Ташиевнинг яқин атрофидаги одамлар депутатларга қўнғироқ қилиб, уларни “генерал томонига ўтиш” ва “янги президентлик сайловини бошлаш”га чақирганини айтди.
Қамчибек Ташиев лавозимидан олинишидан олдин 75 нафар шахс Садир Жапаровдан муддатидан олдин президентлик сайловини ўтказишни сўраганди. Мурожаат муаллифлари кейинчалик қўлга олиниб, айримларига жиноий иш очилган.
Қамчибек Ташиев ишдан олинганида хорижда даволанаётган эди. У ўз истеъфосини “кутилмаган қарор” деб атаган. Қирғизистон президенти эса бу уларнинг дўстлигига таъсир қилмаслигини айтган. Шундан сўнг Ташиев Қирғизистонга қайтган ва Садир Жапаров билан учрашган.
Президент учрашувга изоҳ бериб, эндиликда Ташиев давлат хизматида ишламаслигини таъкидлаган. Орадан бир неча кун ўтиб Ташиев Қирғизистонни тарк этганди. Ҳозирда Миллий хавфсизлик давлат қўмитаси раиси лавозимини Жумгалбек Шабданбеков эгаллаб келмоқда.
Қамчибек Ташиев 18 март куни Қирғизистонга қайтгани ва Ички ишлар вазирлигига сўроққа олиб кетилгани ҳақида хабарлар тарқалди. Миллий хавфсизлик қўмитаси собиқ раиси иккита жиноий иш бўйича гувоҳлик берган. У терговга адвокати билан келган, сўроқ якунида Ташиев журналистларга ҳолат юзасидан изоҳ бермаган.
