Қирғизистон президенти Садир Жапаров ва миллий хавфсизлик қўмитаси собиқ раиси Қамчибек Ташиев 20 март куни ҳайит намозини адо этди. Бу ҳақда Президент матбуот хизмати хабар берди.
Садир Жапаров 30 мингдан ортиқ одам йиғилган Бишкек шаҳридаги Эски майдонда ҳайит намозини адо этган. Майдон атрофида милиция ходимлари ва шифокорлар навбатчилик қилган. Жамоат тартиби кучайтирилган режимда таъминланган.
“Муборак Рамазон ҳар бир мусулмон учун маънавий покланиш, сабр-тоқат ва меҳр-шафқат ойидир... Бугунги кунда дунёда, жумладан, Яқин Шарқда юз бераётган сиёсий инқирозлар ва қуролли тўқнашувлар бутун инсоният учун жиддий синов бўлмоқда.
Вазиятни тинчлик, ўзаро ҳурмат ва дипломатик йўл билан ҳал қилиш тарафдори бўлиб келаётган давлат сифатида Қирғизистон ушбу муқаддас Рамазон ҳайити кунларида бутун дунёдаги қуролли можаролар ва зиддиятларнинг тезроқ барҳам топишига, барча халқлар учун осойишталик, хавфсизлик ва барқарорлик ўрнатилишига умид билдиради”, деган Садир Жапаров табригида.
У ҳар бир оилага тинчлик-хотиржамлик, файзу барака ва бахту саодат тилаган. Ўз навбатида, Қамчибек Ташиев “Жал” микрораёнида ўтказилган ҳайит намозида иштирок этган. Ижтимоий тармоқларда тарқалган видеода унинг ёнида Ўш шаҳрининг собиқ мери Женишбек Токторбаев ҳам ўтиргани кўринади. Намоздан сўнг Ташиев аҳолини Рамазон ҳайити билан табриклаган.
“Агар мен кимнидир хафа қилган ёки нотўғри хатти-ҳаракат қилган бўлсам, узр сўрайман. Рамазон ойида ёлғон ва нотўғри маълумотлар тарқатганларни ҳам кечирдим. Умид қиламанки, бундан кейин бундай бўлмайди”, деган Ташиев.
Қамчибек Ташиевнинг ишдан кетиши
10 февраль куни Қамчибек Ташиев Қирғизистон Миллий хавфсизлик давлат қўмитаси раиси лавозимидан озод этилди. Тегишли фармонни республика президенти Садир Жапаров имзолади. У Ташиевнинг яқин атрофидаги одамлар депутатларга қўнғироқ қилиб, уларни “генерал томонига ўтиш” ва “янги президентлик сайловини бошлаш”га чақирганини айтди.
Қамчибек Ташиев лавозимидан олинишидан олдин 75 нафар шахс Садир Жапаровдан муддатидан олдин президентлик сайловини ўтказишни сўраганди. Мурожаат муаллифлари кейинчалик қўлга олиниб, айримларига жиноий иш очилган.
Қамчибек Ташиев ишдан олинганида хорижда даволанаётган эди. У ўз истеъфосини “кутилмаган қарор” деб атаган. Қирғизистон президенти эса бу уларнинг дўстлигига таъсир қилмаслигини айтган. Шундан сўнг Ташиев Қирғизистонга қайтган ва Садир Жапаров билан учрашган.
Президент учрашувга изоҳ бериб, эндиликда Ташиев давлат хизматида ишламаслигини таъкидлаган. Орадан бир неча кун ўтиб Ташиев Қирғизистонни тарк этганди. Ҳозирда Миллий хавфсизлик давлат қўмитаси раиси лавозимини Жумгалбек Шабданбеков эгаллаб келмоқда.
Қамчибек Ташиев 18 март куни Қирғизистонга қайтгани ва Ички ишлар вазирлигига сўроққа олиб кетилгани ҳақида хабарлар тарқалди. Миллий хавфсизлик қўмитаси собиқ раиси иккита жиноий иш бўйича гувоҳлик берган. У терговга адвокати билан келган, сўроқ якунида Ташиев журналистларга ҳолат юзасидан изоҳ бермаган.
