АҚШ ҳукумати Россия байроғи остида сузувчи учта йирик кемага нисбатан қўлланган чекловларни бекор қилди. Бу ҳақда АҚШ Молия вазирлигининг Хорижий активларни назорат қилиш бошқармаси томонидан эълон қилинган расмий баёнотга таяниб “РБК” хабар берди.
Маълум қилинишича, санкциялар қуйидаги кемалардан олиб ташланган:
- Fesco Moneron (контейнер ташувчи кема);
- Fesco Magadan (контейнер ташувчи кема);
- SV.Nikolay (юк кемаси).
Маринетраффиc кемаларни кузатиш хизмати маълумотларига кўра, айни пайтда Fesco Moneron Магадан яқинидаги Нагаев қўлтиғида, Fesco Magadan Япония қирғоқлари яқинида, SV.Nikolay эса Азов денгизида сузмоқда.
Ушбу кемалар турли вақтларда чекловлар остига тушган эди. Жумладан, Fesco Moneron ва Fesco Magadan кемалари 2022 йил 22 февралда PSB leasing компанияси билан алоқалари сабабли санкциялар рўйхатига киритилган.
SV.Nikolay юк кемаси эса 2022 йил 6 апрелда чекловлар рўйхатидан жой олган. Ўшанда мазкур кема билан бирга Россиянинг яна тўртта кемаси — SV.Konstantin, Lady Sevda, Lady Rania ва Lady Leila ҳам санкцияга учраган эди. АҚШ Молия вазирлиги ушбу барча кемалар Алфа леасинг компанияси билан боғлиқ эканини таъкидлади.
Расмий Москва Ғарб томонидан бир неча йилдан бери давом этаётган ва тобора кучайиб бораётган санкциялар босимига Россия дош бера олишини бир неча бор таъкидлаган. Россия расмийлари “дўст бўлмаган давлатлар” ўз санкция сиёсати муваффақиятсизликка учраганини тан олишга журъати етмаётганини қайд этиб келмоқда.
Шу билан бирга, Ғарб давлатларининг ўзида ҳам бир томонлама чекловларнинг самарасизлиги борасида хавотирлар бот-бот янграмоқда.
