Гаитида қуролли ҳужум оқибатида камида 70 киши ҳалок бўлди, 30 киши яраланди. Бу ҳақда ҳуқуқ ҳимоячиларига таяниб, Al Jazeera хабар берди.
Расмий маълумотларда қурбонлар сони тахминан 16 киши деб баҳоланган. Ҳужум 29 март куни эрта тонгда Артибонит минтақасидаги Жан Дени атрофидаги қишлоқларда бошланган. Қуролланган тўда аъзолари ҳудудга бостириб кириб, уйларни ёқиб юборган.
Defenseurs Plus ҳуқуқ ташкилоти зўравонлик сабаб 6 мингга яқин одам уйини тарк этганини билдирди. БМТ эса ҳужумдан олдинги кунларда 2 мингдан ортиқ киши ҳудудни тарк этганини таъкидлади.
Полиция дастлаб 16 киши ҳалок бўлгани ва 10 киши яралангани ҳақида хабар берган. Фуқаро муҳофазаси органларининг дастлабки ҳисоботида эса 17 киши ҳалок бўлгани ва 19 киши яралангани айтилган. БМТ вакили қурбонлар сони 80 кишигача бўлиши мумкинлигини билдирди ва воқеани тўлиқ текширишга чақирди.
“Хавфсизлик чораларининг йўқлиги ва Артибонит ҳудудининг қуролли гуруҳларга ташлаб қўйилгани расмийларнинг масъулиятдан воз кечганини кўрсатади”, дейилади Defenseurs Plus ва “Артибонитни қутқариш жамоаси” қўшма баёнотида.
Ижтимоий тармоқларда тарқалган аудио хабарда ҳужум учун “Гран Гриф” гуруҳи етакчиси Люксон Элан жавобгарликни ўз зиммасига олгандек кўринади. У буни рақиб гуруҳ ҳужумларига жавоб сифатида изоҳлаган.
Артибонит мамлакатнинг асосий қишлоқ хўжалиги ҳудуди ҳисобланади. Сўнгги йилларда бу ерда зўравонликлар кучайган. Тўдалар ўртасидаги можаро пойтахт Порт-ау-Принседан ташқарига ҳам ёйилган.
Гаити миллий полицияси учта зирҳли техника сафарбар этилганини маълум қилди. Бироқ йўлларга қазилган чуқурлар сабаб уларнинг ҳаракати секинлашган. Расмийларга кўра, полиция етиб келганида қуролли гуруҳ ҳудуддан қочиб кетаётган бўлган ва бир нечта уй аллақачон ёқиб юборилган эди.
Жароҳатланганлар маҳаллий шифохонага, ҳалок бўлганлар эса икки моргга етказилган. Полиция қочиб кетган тўда аъзоларини қўлга олиш бўйича амалиёт бошлаган. Defenseurs Plus маълумотига кўра, камида 50 та уй ёқиб юборилган.
2021-йилдан бери Гаитида қарийб 20 минг киши ҳалок бўлди. Қуролли тўдалар, хавфсизлик кучлари ва маҳаллий ўзини ҳимоя қилувчи гуруҳлар ўртасидаги тўқнашувлар сабаб қурбонлар сони йилдан-йилга ортиб бормоқда.
“Гран Гриф” ва “Вив Ансанм” гуруҳлари АҚШ томонидан террорчи ташкилотлар деб эълон қилинган. Улар оммавий қотилликлар, зўрлаш, ўт қўйиш, ўғрилик ҳамда қурол, гиёҳванд моддалар ва инсон аъзолари савдосида айбланмоқда. АҚШ ушбу гуруҳларнинг молиявий фаолияти ҳақида маълумот берганларга 3 миллион долларгача мукофот ваъда қилган.
