АҚШ президенти Дональд Трамп россиялик ҳамкасби Владимир Путинга қўнғироқ қилиб, Эрон, Украина ва Венесуэла атрофидаги вазиятни муҳокама қилди. Бу ҳақда Россия президенти ёрдамчиси Юрий Ушаков маълум қилди.
Унинг сўзларига кўра, суҳбат тахминан бир соат давом этган. Асосий эътибор Эрон билан боғлиқ можаро ва АҚШ вакиллари иштирокида олиб борилаётган Украина бўйича уч томонлама музокараларга қаратилган.
“Россия президенти Эрон можаросини тезроқ сиёсий-дипломатик йўл билан ҳал қилишга қаратилган бир қатор фикрларни билдирди. Форс кўрфази давлатлари раҳбарлари, Эрон президенти ва бошқа бир қатор етакчилар билан бўлиб ўтган мулоқотлар ҳам ҳисобга олинди. АҚШ президенти АҚШ–Исроил олиб бораётган операция контекстида вазиятнинг ривожланишига ўз баҳосини берди”, деди Ушаков.
У бу бўйича томонлар “жуда фойдали” фикр алмашганини таъкидлади.
“Президент Трамп Украинадаги можаро имкон қадар тезроқ ўт очишни тўхтатиш ва узоқ муддатли келишувга эришиш билан якунланишидан манфаатдор эканини билдирди”, деди Путиннинг ёрдамчиси.
Шунингдек, у Трамп ва унинг жамоаси олиб бораётган воситачилик саъй-ҳаракатларини Россия ижобий баҳолаганини айтди.
“Айни пайтда Россия қўшинлари жуда муваффақиятли олдинга силжиётган жанговар тўқнашув чизиғидаги вазиятга баҳо берилди”, деди Юрий Ушаков.
У бу омил Украинани ”можарони музокаралар йўли билан ҳал қилишга ундаши”ни маълум қилди. Бундан ташқари, Россия ва АҚШ президентлари Венесуэла атрофидаги вазиятга, биринчи навбатда, жаҳон нефть бозоридаги ҳолат контекстида ҳам тўхталган.
Ушаковнинг сўзларига кўра, Трамп Путин билан мулоқот мунтазам равишда амалга оширилиши кераклигини айтган.
“Иккала етакчи ҳам бунга тайёрлигини айтди. Суҳбат жуда мазмунли бўлди ва шубҳасиз, икки давлатнинг халқаро сиёсатнинг турли йўналишларида кейинги фаолияти учун амалий аҳамиятга эга бўлади”, дея хулоса қилди у.
Ўз навбатида, АҚШ президенти россиялик ҳамкасби билан бўлиб ўтган суҳбатга қуйидагича изоҳ берган:
“Президент Путин билан жуда яхши мулоқот қилдик. Биз томондан ҳам, у томондан ҳам линияда жуда кўп одам бор эди. Биз Украина ҳақида гаплашдик — бу шунчаки чексиз кураш. Президент Путин ва президент Зеленский ўртасида жуда катта нафрат бор, улар келиша олмаётганга ўхшайди. Аммо бу мавзу бўйича ижобий қўнғироқ бўлди деб ўйлайман”.
