Украина ташқи ишлар вазири Андрей Сибига Венгрия ҳукуматини мамлакат давлат жамғарма банкининг етти нафар ходимини гаровга олишда, шунингдек, жуда кўп миқдордаги нақд пул ва олтинни ўғирлашда айблади. Бу ҳақда Euronews хабар берди.
Украинанинг Ошчадбанк (Давлат жамғарма банки) маълумотларига кўра, банк ходимлари ва тахминан 75 миллион доллар миқдоридаги маблағни олиб кетаётган микроавтобус Будапешт марказида тўхтатиб қолинган. Автомобиль Австриядан Украинага нақд пул ташиётган бўлган. Киев ҳозирда микроавтобусдаги банк ходимлари билан алоқа бутунлай узилганини билдирмоқда.
Мазкур ҳодиса икки давлат ўртасидаги мураккаб муносабатларнинг кескинлашувидаги янги нуқта бўлди. Бир кун аввал Венгрия бош вазири Виктор Орбан ва Украина президенти Владимир Зеленский ўзаро бир-бирини англаб, зарурат туғилса, куч ишлатишни инкор этмаган эди.
“Будапештда Венгрия расмийлари етти нафар Украина фуқаросини асирга олди. Аслида гап Венгрия томонидан одамларни гаровга олиш ва пулларни ўғирлаш ҳақида кетмоқда”, деб ёзди Украина ТИВ раҳбари Сибига X ижтимоий тармоғидаги саҳифасида.
Ошчадбанк ўз баёнотида Венгрия ҳаракатларини асоссиз деб атади ва ходимларнинг зудлик билан қўйиб юборилишини ҳамда мулкнинг Украинага қайтарилишини талаб қилди.
Машинада нималар бўлган?
Банк берган маълумотга кўра, юк машиналарида қуйидагилар бўлган:
- 40 миллион АҚШ доллари;
- 35 миллион евро;
- 9 килограмм олтин.
Таъкидланишича, ушбу конвой Австриянинг Раиффеисен Банк корхонаси билан келишилган ҳолда ташкил этилган.
“Юк халқаро ташув қоидалари ва амалдаги Европа божхона тартиб-таомилларига мувофиқ рўйхатга олинган эди”, дейилади банк хабарида. Венгрия расмийлари ҳозирча ушбу даъволарга муносабат билдирмади.
Будапешт ва Киев ўртасидаги жиддий низо Украинанинг ўз ҳудуди орқали Венгрияга арзон Россия нефтини етказиб берувчи “Дружба” қувурини ёпиб қўйгани сабабли юзага келган. Қувур январь ойи охирида Россия ҳужуми оқибатида шикастлангани тахмин қилинмоқда ва ўшандан бери таъмирланмаган.
Венгрия Украинани ушбу масаладан сиёсий шантаж воситаси сифатида фойдаланаётганликда айблаб келмоқда.
