АҚШнинг Эрон билан уруши Америка иқтисодиётига 210 миллиард долларгача зарар етказиши мумкин. Бу ҳақда Уортон мактаби профессори ва молиявий таҳлилчи Кент Сметтерсга таяниб, The Independent хабар берди.
Давом этаётган можаро аллақачон халқаро савдо, глобал энергия бозорлари ва ёқилғи нархларига ўз таъсирини кўрсатмоқда. Бироқ уруш иқтисодиётга қанчалик зарар етказишини аниқ ҳисоблаш қийин.
Кент Сметтерс прогнозларига кўра, ҳозирда иқтисодий йўқотиш 115 миллиард долларни ташкил этади, аммо бу кўрсаткич можаронинг табиати ва давомийлигига қараб 50 миллиард доллардан 210 миллиард долларгача етиши мумкин.
АҚШ президенти Дональд Трамп ҳам уруш иқтисодиёт учун хавф туғдираётганини тан олган. У Форс кўрфазидаги муҳим ўтиш йўллари орқали ҳаракатланаётган энергия танкерлари учун ҳукумат томонидан кафолатланган суғурта ва ҳарбий-денгиз кузатувини таклиф қилмоқда.“Агар Эрон ҳақиқатан ҳам ядро қуролига эга бўлганида, биз келажакда ҳарбий мақсадларга ва ҳатто вайрон бўлган шаҳарларни қайта тиклашга ҳозиргидан анча кўп маблағ сарфлашимизга тўғри келиши мумкин эди”, деди таҳлилчи.
Вашингтонда журналистлар билан суҳбатда Трамп уруш туфайли нефть нархи “бир муддат” юқори бўлиши мумкинлигини айтди. Бироқ низо якунлангач, “бу нархлар тушишига, ҳатто аввалгидан ҳам пастроқ бўлишига ишонаман” дея таъкидлади.“Агар зарурат туғилса, АҚШ Ҳарбий-денгиз кучлари имкон қадар тезроқ Ҳормуз бўғози орқали танкерларни кузатиб боришни бошлайди. Нима бўлишидан қатъи назар, Қўшма Штатлар дунё бўйлаб энергия оқимининг эркинлигини таъминлайди. Қўшма Штатларнинг иқтисодий ва ҳарбий қудрати Ер юзидаги энг буюк кучдир”, деган эди у.
3 март кунги савдолар якунида Wеst Теxas Intermediate маркали хом нефть нархи 5 фоиздан кўпроққа ошди, мамлакат бўйлаб бир галлон бензиннинг ўртача нархи эса 10 сентдан кўтарилди. Таҳлилчилар урушнинг иқтисодий оқибатлари кўп жиҳатдан можаро қанча давом этишига боғлиқ эканини айтмоқда.
Иқтисодий зарардан ташқари, АҚШнинг ҳарбий операцияси яна 65 миллиард доллар бюджет харажатини талаб қилиши мумкин. АҚШ ва Исроил 28 февралдан бери Эронга зарбалар бермоқда. Теҳрон АҚШнинг ҳарбий базалари ва дипломатик миссиялари жойлашган Исроил ва Форс кўрфази мамлакатларига ҳужумлар билан жавоб қайтармоқда.“Бозорлар узоқ давом этадиган ҳарбий тўқнашув хавфини етарлича ҳисобга олмаяпти. Агар операция тез якунланмаса ва Ҳормуз бўғози орқали ҳаракатланиш тезда тикланмаса, вазият анча мураккаблашиши мумкин”, деди Байденнинг собиқ иқтисодий маслаҳатчиси Алекс Жаккес.
