АҚШ ва Исроил зарбаларидан сўнг Эроннинг янги раҳбарияти Вашингтонга музокараларни қайта бошлаш таклифини билдирган. Бу ҳақда Дональд Трамп маълум қилди.
“Улар гаплашиб олмоқчи, мен эса бунга розилик бердим. Шунинг учун улар билан мулоқот қиламан. Буни олдинроқ қилишлари керак эди. Жуда амалий ва осон амалга ошириладиган таклифни илгари суришлари лозим эди. Улар жуда узоқ кутди”, деди Оқ уй раҳбари 1 март, якшанба куни The Атлантиc нашрига берган интервьюсида.
АҚШ президенти музокаралар қачон ўтказилиши мумкинлиги ҳақидаги саволга жавоб беришдан бош тортди. Унинг аниқлик киритишича, сўнгги ҳафталарда Вашингтон алоқада бўлган айрим эронлик музокарачилар зарбалар оқибатида ҳалок бўлган.
“Улар келишувга эришиши мумкин эди. Буни олдинроқ қилишлари керак эди. Улар ҳаддан ташқари айёрлик қилди”, деди Трамп.
АҚШ операцияси “режадан илгарилаб бормоқда”
CNBC телеканалига берган интервьюсида Трамп АҚШнинг Эрондаги операцияси “жуда яхши кетаётганини” таъкидлади.
“Бу — жуда шафқатсиз режим, тарихдаги энг шафқатсиз тузумлардан бири. Биз ишимизни нафақат ўзимиз, балки бутун дунё учун бажаряпмиз. Жараён режа бўйича эмас, балки ундан ҳам тез кетмоқда”, деди у.
Шунингдек, воқеалар “жуда ижобий йўналишда ривожланаётганини” қўшимча қилди.
Fox News телеканалига берган интервьюсида Трамп, агар АҚШ ва Исроил ҳарбий операцияни бошламаганида, “Эрон икки ҳафта ичида ядровий қуролга эга бўларди”, дея таъкидлади. “Шунда бу жараённи тўхтатишнинг имкони бўлмас эди”, деди у.
Исроил ва АҚШнинг Эронга қарши ҳарбий операцияси
28 февраль куни эрталаб Исроил ва АҚШ Теҳрон ҳамда Эрон ҳудудидаги бошқа нуқталарга зарба берди. Дональд Трамп Ислом Республикасининг ядровий дастурини йўқ қилиш ниятини маълум қилди. У Эрон армиясини қуролни ташлашга, мамлакат аҳолисини эса “ўз тақдирини ўз қўлига олишга” чақирди.
Эрон бунга жавобан Исроил ва Яқин Шарқдаги бошқа ҳудудларга зарбалар берди. АҚШ Қуролли кучлари Марказий қўмондонлиги 28 февраль куни Эрон зарбалари натижасида АҚШ объектларига етказилган зарар “минимал” эканини ва операцияларга таъсир қилмаганини билдирган эди.
Бироқ 1 март куни уч нафар америкалик ҳарбий ҳалок бўлгани, яна беш нафари оғир яралангани маълум қилинди.
Исроил-АҚШ ҳарбий операциясининг иккинчи кунида Эрон томони зарбалар натижасида мамлакат олий раҳнамоси Оятуллоҳ Али Хоманаий ҳамда бир қатор юқори мартабали ҳарбий раҳбарлар, жумладан мудофаа вазири Азиз Носирзода ва Ислом инқилоби қўриқчилари корпуси қўмондони Муҳаммад Пакпур ҳалок бўлганини тасдиқлади.
